वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

मुंबईत BMC अधिकाऱ्यांवर फेरीवाल्यांचा जीवघेणा हल्ला; कांदिवलीत पळवून पळवून मारहाण, व्हिडिओ व्हायरल

अनधिकृत फेरीवाल्यांवर कारवाई करताना पालिका कर्मचाऱ्यांवर हल्ला; आमदार अतुल भातखळकरांचा बांगलादेशी आणि मुस्लिम हल्लेखोरांचा गंभीर आरोप

मुंबईच्या कांदिवली परिसरात शुक्रवारी संध्याकाळी एक अत्यंत धक्कादायक घटना घडली. अनधिकृत फेरीवाल्यांवर कारवाई करण्यासाठी गेलेल्या मुंबई महानगरपालिकेच्या (BMC) अधिकारी आणि कर्मचाऱ्यांवर मोठ्या जमावाने हल्ला केला. या हल्ल्यात काही पालिका कर्मचारी जखमी झाले असून, सोशल मीडियावर व्हायरल झालेल्या व्हिडिओमध्ये फेरीवाल्यांनी अधिकाऱ्यांना पळवून पळवून मारहाण केल्याचे दृश्य समोर आले आहे.

नेमकं काय घडलं?

हा हल्ला कांदिवलीतील लोखंडवाला कॉम्प्लेक्स परिसरात घडला. BMC चे कर्मचारी शुक्रवारी संध्याकाळी रस्त्यावरील अनधिकृत दुकानांवर कारवाई करण्यासाठी तेथे गेले होते. यावेळी मोठ्या संख्येने जमलेल्या फेरीवाल्यांच्या जमावाने पालिका अधिकाऱ्यांना घेराव घालत मारहाण करण्यास सुरुवात केली. ही घटना विधानसभेत अनधिकृत फेरीवाल्यांचा मुद्दा गाजत असतानाच घडल्याने राजकीय वर्तुळात खळबळ उडाली आहे.

भातखळकरांचे गंभीर आरोप

या प्रकरणी स्थानिक भाजप आमदार अतुल भातखळकर यांनी गंभीर आरोप केले आहेत. त्यांनी हल्लेखोरांमध्ये मुस्लिम आणि बांगलादेशी नागरिकांचा समावेश असल्याचा दावा केला आहे. ते म्हणाले, "या हल्ल्यातील हल्लेखोर हे क्रांतीनगरमधील मुस्लिम आणि बांगलादेशी आहेत. मी यासंदर्भात कालच सभागृहात विषय मांडला होता. या सर्वांवर कठोर कारवाई करण्यात यावी, असे मी आदेश दिले आहेत."

पोलिसांची कारवाई

पोलिसांनी याप्रकरणी १२ ते १३ जणांवर गुन्हा दाखल केला असून, त्यातील ४ ते ५ आरोपींना ताब्यात घेतले आहे. या हल्ल्यात काही पालिका कर्मचारी जखमी झाले आहेत. दरम्यान, भातखळकर यांनी सोमवारी पुन्हा एकदा हा मुद्दा विधानसभेत उपस्थित करणार असल्याचे सांगितले आहे. पालिकेच्या अधिकाऱ्यांवरील असा हल्ला खपवून घेतला जाणार नाही, अशी भूमिकाही त्यांनी मांडली.

या घटनेनंतर परिसरात तणावाचे वातावरण असून, पोलिसांनी परिसरात पेट्रोलिंग वाढवले आहे. अनधिकृत फेरीवाल्यांच्या हल्ल्याचा हा प्रकार मुंबईतील कायदा आणि सुव्यवस्थेचा प्रश्न ऐरणीवर आणणारा ठरला आहे.

कांदिवलीत BMC अधिकाऱ्यांवर फेरीवाल्यांनी केलेल्या हल्ल्यानंतरचे दृश्य.