म्हसवड : धुळदेवमध्ये भयानक अपघात, दोघे जागीच ठार; तीन जखमी

किरकोळ जखमी होऊनही दुचाकीवरून नागपूर गाठले; उपचारानंतर दिल्लीला रवाना, काही महिन्यांपूर्वीही झाला होता अपघात

नागपूर : काँग्रेसचे भंडारा-गोंदिया लोकसभा मतदारसंघाचे खासदार डॉ. प्रशांत पडोळे यांच्या वाहनाचा सोमवारी पहाटे भीषण अपघात झाला. दिल्लीत सुरू असलेल्या संसदेच्या अर्थसंकल्पीय अधिवेशनासाठी ते नागपूर एअरपोर्टवरून दिल्लीला जाण्यासाठी निघाले होते. त्यावेळी नागपूर जिल्ह्यातील हल्दीरामसमोर एका ट्रकने त्यांच्या वाहनाला जोरदार धडक दिली.

कारचा पुढील भाग चक्काचूर

ही धडक इतकी जोरदार होती की, प्रशांत पडोळे यांच्या कारचा पुढील भाग पूर्णपणे चक्काचूर झाला. मात्र, सुदैवाने खासदार या अपघातातून थोडक्यात बचावले. ते किरकोळ जखमी झाले असून, त्यांनी स्वतःच्या पायाने नागपूर गाठले.

दुचाकीवरून नागपूर गाठले

अपघातानंतर खासदार प्रशांत पडोळे यांनी एका दुचाकीस्वाराला लिफ्ट मागून नागपूर गाठले. तेथे प्राथमिक उपचार घेतल्यानंतर ते नागपूर एअरपोर्टवर पोहोचले आणि दिल्लीकडे रवाना झाले. अपघाताच्या वेळी ते सुरक्षारक्षक आणि चालकासह प्रवास करत होते.

दुसऱ्यांदा अपघात

यापूर्वीही काही महिन्यांपूर्वी नागपूर येथेच खासदार प्रशांत पडोळे यांच्या वाहनाचा भीषण अपघात झाला होता. त्या अपघातातही ते किरकोळ जखमी झाले होते. खासदारांच्या वाहनाचा हा दुसरा अपघात असून, नेमके कारण समोर आलेले नाही. पोलीस या प्रकरणाचा तपास करत आहेत.

रत्नागिरीच्या भोस्ते घाटात केमिकल टँकर पलटी; पीएफएएस वादातील कंपनीच्या टँकरमुळे परिसरात खळबळ

ज्वलनशील रसायन घेऊन जाणारा टँकर पलटला; अग्निशमन दलासह सेफ्टी टीम घटनास्थळी, रसायन दुसऱ्या टँकरमध्ये हस्तांतरित

रत्नागिरी : रत्नागिरी जिल्ह्यातील भोस्ते घाटात रविवारी संध्याकाळी एक केमिकल टँकर पलटी झाल्याची घटना घडली आहे. पीएफएएस विवादात सापडलेल्या लक्ष्मी ऑरगॅनिक कंपनीचा हा टँकर असल्याने परिसरात खळबळ उडाली आहे. टँकरमध्ये इथाइल ऍसिटेट हे ज्वलनशील केमिकल होते.

संध्याकाळी सात वाजता घडला अपघात

हा अपघात रविवारी संध्याकाळी सात वाजण्याच्या सुमारास झाला. परदेशात निर्यात करण्यासाठी केमिकल घेऊन हा टँकर मुंबईच्या दिशेने जात असताना भोस्ते घाटात पलटी झाला. अपघातानंतर परिसरात भीतीचे वातावरण निर्माण झाले होते.

सायन दुसऱ्या टँकरमध्ये हस्तांतरित

घटनेची माहिती मिळताच अग्निशमन दलाच्या गाड्या, पोलीस आणि लक्ष्मी ऑरगॅनिक कंपनीची सेफ्टी टीम घटनास्थळी दाखल झाली. कंपनी प्रशासनाला अपघातग्रस्त टँकरमधील रसायन दुसऱ्या टँकरमध्ये हस्तांतरित करण्यात यश आले. पहाटे रसायन सुरक्षित स्थळी हलवण्यात आले. त्यानंतर पोलीस प्रशासनाच्या मदतीने अपघातग्रस्त टँकर बाजूला हटवण्यात आला.

पीएफएएस वादातील कंपनी

उल्लेखनीय म्हणजे, पीएफएएस (पर्फ्लोरोअल्किल आणि पॉलिफ्लोरोअल्किल पदार्थ) या विषारी रसायनाच्या वादात सापडलेली ही लक्ष्मी ऑरगॅनिक कंपनी आहे. या कंपनीमुळे परिसरातील पाण्याचे प्रदूषण झाल्याचे आरोप करण्यात आले होते. सध्या या कंपनीवर कारवाईची प्रक्रिया सुरू आहे. याच पार्श्वभूमीवर झालेल्या या अपघातामुळे परिसरातील नागरिकांमध्ये चिंतेचे वातावरण आहे. सुदैवाने या अपघातात कोणतीही जीवितहानी झाली नसून, प्रशासनाने तात्काळ कारवाई करत परिस्थिती नियंत्रणात आणली.