वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

 टीम इंडियाच्या विश्वचषक विजयानंतर शोएब अख्तरचं मोठं वक्तव्य; म्हणाला, "रोहित-विराटलाही बाहेर काढलं आणि..."

 "भारताने नावं नाही तर गुणवत्ता पाहिली, संजू सॅमसनचा निर्णय ठरला किंग मेकर"

टीम इंडियाने विश्वचषक जिंकताच शोएब अख्तरचं विधान चर्चेत; म्हणाला, "रोहित-विराटला बाहेर काढलं आणि आता..."

नवी दिल्ली: भारताने न्यूझीलंडचा ९६ धावांनी दणदणीत पराभव करत आयसीसी टी-२० विश्वचषक २०२६ सलग दुसऱ्यांदा आणि एकूण तिसऱ्यांदा जिंकला. या ऐतिहासिक विजयानंतर भारताचे कौतुक होत असतानाच पाकिस्तानचे माजी दिग्गज वेगवान गोलंदाज शोएब अख्तर यांनी केलेले भाष्य चर्चेत आले आहे. अख्तर यांनी भारताच्या निवड धोरणाचे आणि संघातील एकोप्याचे खास शैलीत कौतुक केले.

"रोहित-विराटला वगळण्याचा निर्णय योग्य होता"

शोएब अख्तर यांनी आपल्या यूट्यूब चॅनलवर बोलताना भारतीय संघ व्यवस्थापन आणि प्रशिक्षक गौतम गंभीर यांच्या रणनीतीची प्रशंसा केली. युवा खेळाडूंना संधी देण्याच्या भारताच्या धोरणावर बोलताना ते म्हणाले, "भारताने योग्य वेळी योग्य खेळाडूंवर विश्वास दाखवला. संजू सॅमसनला वरच्या क्रमांकावर आणून खेळवणं हा मास्टरस्ट्रोक होता."

यावेळी त्यांनी थेट रोहित शर्मा आणि विराट कोहली या दिग्गजांचे उदाहरण देत मोठं वक्तव्य केलं. "सगळ्यात मोठी गोष्ट म्हणजे भारताने नावांपेक्षा गुणवत्तेला प्राधान्य दिलं. १५ जणांच्या संघात निवड होत असताना अनेक मोठी नावं वगळली गेली. रोहित शर्मा आणि विराट कोहली सारख्या दिग्गजांनाही बाहेरचा रस्ता दाखवण्यात आला. आणि आता ते हा विश्वचषक जिंकले आहेत. हे दाखवून देते की निर्णय किती योग्य होते," असे अख्तर म्हणाले.

"भारत योग्य ठिकाणी पैसे गुंतवतो"

अख्तर यांनी भारतीय क्रिकेटच्या पायाभूत सुविधांचेही कौतुक केले. ते पुढे म्हणाले, "भारत ज्या पद्धतीने क्रिकेटच्या पायाभूत सुविधांवर, प्रशिक्षण केंद्रांवर आणि तंत्रज्ञानावर पैसा गुंतवतोय, ते अप्रतिम आहे. याचाच परिणाम म्हणून आज ते यशस्वी ठरत आहेत. २०२७ चा विश्वचषक जर आज मिळत असेल तर भारताने आजच घ्यावा."

गौतम गंभीरच्या कार्यशैलीची प्रशंसा करताना अख्तर म्हणाले की, गंभीरने हे सिद्ध केले आहे की योग्य प्रतिभेला संधी दिली तर चांगले परिणाम मिळतातच. तसेच मैदानावर तीन माजी कर्णधार एकत्र दिसल्याने संघातील एकोपा आणि परस्पर आदर याचे दर्शन झाल्याचेही त्यांनी नमूद केले.

शाहीद आफ्रिदीनेही केले कौतुक

पाकिस्तानचे आणखी एक माजी दिग्गज शाहीद आफ्रिदी यांनीही टीम इंडियाच्या विजयावर आनंद व्यक्त केला. ते म्हणाले, "टीम इंडिया या विश्वचषकाला पात्र होती. संघात दर्जा होता आणि बेंचवर बसलेल्या खेळाडूंची नावंही मोठी होती. संजू सॅमसनला सलामीला पाठवण्याचा निर्णय चांगला होता आणि त्याने तो योग्य ठरवला. बुमराहनेही शानदार गोलंदाजी केली. विजयाबद्दल टीम इंडियाचं खूप खूप अभिनंदन."