वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

एकनाथ शिंदेंची पंतप्रधान मोदींसोबत दीड तास चर्चा; संसदेत पोहोचताच किरण रिजिजू यांचं 'श्रीकांत मेरा छोटा भाई'

अधिवेशन सोडून दिल्लीत धावलेले शिंदे, पंतप्रधानांनंतर ओम बिर्ला यांचीही भेट; राजकीय समीकरणांवर सीलबंद चर्चा

नवी दिल्ली: राज्यात अर्थसंकल्पीय अधिवेशन सुरू असतानाच उपमुख्यमंत्री एकनाथ शिंदे यांनी अचानक केलेल्या दिल्ली दौऱ्याने राजकीय वर्तुळात जोरदार चर्चा सुरू आहे. शिंदे यांनी मंगळवारी पंतप्रधान नरेंद्र मोदी यांच्यासोबत तब्बल दीड तास सखोल चर्चा केल्याने आगामी राजकीय रणनीतीबाबत अनेक तर्कवितर्क लढवले जात आहेत.

पीएमसोबत सीलबंद बैठक

सकाळी ११ ते १२.२० या वेळेत पंतप्रधान नरेंद्र मोदी यांच्यासोबत झालेल्या या बैठकीत जागावाटप, युतीतील समन्वय आणि शिवसेनेच्या भविष्यातील भूमिकेवर चर्चा झाल्याचे सूत्रांनी सांगितले. यानंतर १२.३० वाजता शिंदे यांनी लोकसभा अध्यक्ष ओम बिर्ला यांचीही भेट घेतली.

रिजिजू यांचं वक्तव्य चर्चेत

दरम्यान, उपमुख्यमंत्री एकनाथ शिंदे आज संसद परिसरात दाखल झाले असता त्यांची भेट केंद्रीय मंत्री किरण रिजिजू यांच्याशी झाली. यावेळी खासदार श्रीकांत शिंदे हे देखील एकनाथ शिंदे यांच्यासोबत उपस्थित होते. रिजिजू यांनी एकनाथ शिंदे यांना उद्देशून "श्रीकांत मेरा छोटा भाई है", असे म्हटल्याचे समोर आले आहे. या संभाषणामुळे शिवसेना आणि भाजपमधील जवळीक अधोरेखित झाली असून, नेत्यांमधील सौहार्दपूर्ण संबंध दिसून आले.

खासदारांची बैठक आणि पुढील रणनीती

शिंदे यांनी काल खासदार डॉ. श्रीकांत शिंदे यांच्या निवासस्थानी शिवसेना खासदारांची महत्त्वपूर्ण बैठक घेतली. यामध्ये अर्थसंकल्पीय अधिवेशनात पक्षाची भूमिका, युद्धजन्य परिस्थितीत केंद्र सरकारच्या धोरणांना पाठिंबा आणि विरोधकांच्या 'फेक नॅरेटिव्ह'चा पर्दाफाश करण्याचा निर्णय घेण्यात आला. तसेच सर्वोच्च न्यायालयात सुरू असलेल्या शिवसेना पक्ष आणि धनुष्यबाण चिन्ह प्रकरणाचा आढावा घेण्यासाठी ते वकिलांचीही भेट घेणार आहेत.

फडणवीसही रवाना

दुसरीकडे, मुख्यमंत्री देवेंद्र फडणवीस हे बुधवारी दिल्ली दौऱ्यावर जाणार असून ते केंद्रीय संचलन समितीच्या बैठकीला उपस्थित राहणार आहेत. पाच राज्यांतील निवडणुकांच्या पार्श्वभूमीवर तिकीट वाटप आणि निवडणूक रणनीतीवर या बैठकीत चर्चा होण्याची शक्यता आहे. शिंदे यांच्या दिल्ली दौऱ्यानंतर फडणवीसही दिल्लीला जात असल्याने युतीतील समन्वय आणि आगामी काळातील राजकीय हालचालींबाबत महत्त्वाचे संकेत मिळू शकतात.