वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

नांदेडमध्ये २५ वर्षीय विद्यार्थिनीची आत्महत्या; राष्ट्रवादी काँग्रेसचे नेते जीवन घोगरे पाटील यांच्यावर गुन्हा दाखल

फी भरण्यासाठी तगादा लावल्याने वैद्यकीय विद्यार्थिनीने घेतला टोकाचा निर्णय; वडिलांच्या तक्रारीवरून ॲट्रॉसिटीसह गुन्हा दाखल

नांदेड, दि. ७ – नांदेड शहरात एका २५ वर्षीय वैद्यकीय विद्यार्थिनीने आत्महत्या केल्याची धक्कादायक घटना घडली आहे. या प्रकरणी राष्ट्रवादी काँग्रेस (अजित पवार गट) चे माजी विरोधी पक्षनेते जीवन घोगरे पाटील यांच्याविरोधात आत्महत्येस प्रवृत्त केल्याचा आणि ॲट्रॉसिटी कायद्याअंतर्गत गुन्हा दाखल करण्यात आला आहे. या घटनेमुळे शहरात मोठी खळबळ उडाली आहे.

कोण होती आकांक्षा गायकवाड?

आत्महत्या केलेल्या विद्यार्थिनीचे नाव आकांक्षा मुंजाजी गायकवाड (वय २५) आहे. ती शामराव कदम होमिओपॅथिक महाविद्यालयात द्वितीय वर्षाचे शिक्षण घेत होती. शिक्षणासाठी ती नांदेडच्या हडको परिसरात राहत होती. आकांक्षाचे आई-वडील वीटभट्टीवर मजुरी करून आपला उदरनिर्वाह करतात.

काय घडले?

शुक्रवारी दुपारी आकांक्षा हडको परिसरातील एका इमारतीत असलेल्या वसतीगृहात आपल्या खोलीत पंख्याला गळफास घेतलेल्या अवस्थेत आढळून आली. हे वसतिगृह राष्ट्रवादी काँग्रेसचे प्रदेश सचिव तथा माजी विरोधी पक्षनेते जीवन घोगरे पाटील यांच्या मालकीचे असल्याचे सांगितले जाते. घटनेची माहिती मिळताच नांदेड ग्रामीण पोलीस ठाण्याचे पोलीस निरीक्षक ओमकांत चिंचोळकर यांनी घटनास्थळी धाव घेतली.

वडिलांचा गंभीर आरोप

मृत विद्यार्थिनीच्या वडिलांनी जीवन घोगरे पाटील यांच्यावर गंभीर आरोप केले आहेत. "गेल्या आठ ते दहा महिन्यांपासून वसतिगृहाची थकीत फी भरण्यासाठी घोगरे वारंवार तगादा लावत होते. या मानसिक त्रासाला कंटाळूनच आमच्या मुलीने आत्महत्या केली," अशी तक्रार आकांक्षाचे वडील मुंजाजी गायकवाड यांनी पोलिसांकडे केली.

कोण आहेत जीवन घोगरे पाटील?

जीवन घोगरे पाटील हे राष्ट्रवादी काँग्रेसचे ज्येष्ठ नेते असून, पक्ष फुटीनंतर ते अजित पवार यांच्या गटात सामील झाले आहेत. त्यांनी नांदेड महापालिकेचे विरोधी पक्षनेतेपदही भूषवले आहे. राज्यातील मराठवाडा विभागात त्यांचे विशेष राजकीय वर्चस्व आहे.

गुन्हा दाखल, वसतीगृहाच्या परवानगीवर प्रश्नचिन्ह

मृत विद्यार्थिनीच्या वडिलांच्या तक्रारीवरून नांदेड ग्रामीण पोलीस ठाण्यात जीवन घोगरे पाटील यांच्याविरुद्ध आत्महत्येस प्रवृत्त केल्याचा आणि अनुसूचित जाती-जमाती अत्याचार प्रतिबंधक कायद्याअंतर्गत (ॲट्रॉसिटी) गुन्हा दाखल करण्यात आला आहे. या वसतिगृहात सुमारे ४० हून अधिक मुली कॉट बेसिसवर राहत असून प्रत्येकी अडीच हजार रुपये दरमहा आकारले जातात. मात्र, या वसतिगृहाला अधिकृत परवानगी नसल्याची चर्चा स्थानिकांमध्ये सुरू आहे.

ठाणे मांडून आंदोलन

घोगरे यांच्यावर गुन्हा दाखल करण्याच्या मागणीसाठी मृत विद्यार्थिनीच्या नातेवाईकांनी पोलीस ठाण्यात काही काळ ठाणे मांडले होते. त्यानंतर पोलिसांनी गुन्हा नोंदवला. या प्रकरणामुळे राजकीय वर्तुळातही चर्चा रंगल्या असून, नांदेड ग्रामीण पोलीस याप्रकरणी अधिक तपास करत आहेत.

राष्ट्रवादी काँग्रेसचे नेते जीवन घोगरे पाटील यांच्यावर नांदेड येथे आत्महत्या प्रकरणी गुन्हा दाखल.