वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

 वर्ल्ड चॅम्पियन इंडियाचा डंका! पाकिस्तानचे माजी दिग्गज काय म्हणाले? आफ्रिदीपासून हाफीजपर्यंत सगळ्यांचं कौतुक, पण आमिरच्या प्रतिक्रियेने उडाली खळबळ

 टी-20 विश्वचषक २०२६ जिंकल्यानंतर भारताचा गौरव; पाकिस्तानी क्रिकेटपटूंच्या प्रतिक्रिया चर्चेत

नवी दिल्ली : टीम इंडियाने अहमदाबादच्या नरेंद्र मोदी स्टेडियमवर झालेल्या अंतिम सामन्यात न्यूझीलंडचा ९६ धावांनी पराभव करत टी-२० विश्वचषक २०२६ जिंकला. सूर्यकुमार यादवच्या नेतृत्वाखाली भारताने ही कामगिरी करत सलग दुसऱ्यांदा टी-२० विश्वचषक जिंकणारा पहिला संघ होण्याचा मान मिळवला. संजू सॅमसनच्या ८९ धावांच्या खेळीने भारताला मजबूत स्थितीत आणले.

या ऐतिहासिक विजयानंतर जगभरातून अभिनंदनाचा वर्षाव होत आहे. शेजारील पाकिस्तानमधील माजी क्रिकेटपटूंनीही आपापल्या शैलीत प्रतिक्रिया दिल्या आहेत.

शाहिद आफ्रिदीचे कौतुक

पाकिस्तानचा माजी कर्णधार शाहिद आफ्रिदीने भारतीय संघाच्या विजयाबद्दल अभिनंदन केले. "भारतीय संघ सध्या खूप मजबूत दिसत आहे आणि संपूर्ण स्पर्धेत त्याने उत्कृष्ट कामगिरी केली. भारताची क्रिकेट व्यवस्था खूप मजबूत आहे, म्हणूनच संघ सातत्याने चांगली कामगिरी करत आहे," असे आफ्रिदी म्हणाला.

अहमद शहजादचे कौतुक

पाकिस्तानचा फलंदाज अहमद शहजादनेही भारतीय संघाचे अभिनंदन करताना विशेषतः संजू सॅमसन आणि अभिषेक शर्मा यांच्या खेळीचे कौतुक केले. त्याने पाकिस्तानी क्रिकेटमधील कमतरता दाखवत भारताच्या यशापासून शिकण्याची आवश्यकता असल्याचे म्हटले.

शोएब अख्तरचे भारतीय व्यवस्थेचे कौतुक

माजी वेगवान गोलंदाज शोएब अख्तरने भारताच्या क्रिकेट व्यवस्थेचे उघडपणे कौतुक केले. "भारताची क्रिकेट रचना खूप मजबूत आहे आणि म्हणूनच संघ सातत्याने मोठ्या स्पर्धा जिंकत आहे," असे तो म्हणाला.

मोहम्मद हाफीजचे अभिनंदन

पाकिस्तानचा माजी अष्टपैलू मोहम्मद हाफीजने भारताला सलग दोन टी-२० विश्वचषक जिंकल्याबद्दल अभिनंदन केले. त्याने भारतीय खेळाडूंच्या सातत्य आणि संघाच्या संतुलनाचेही कौतुक केले.

मोहम्मद आमिरच्या प्रतिक्रियेने खळबळ

मात्र, पाकिस्तानचा माजी वेगवान गोलंदाज मोहम्मद आमिरच्या प्रतिक्रियेने सोशल मीडियावर खळबळ उडाली आहे. आमिरने भारताला अभिनंदन केले असले तरी त्याचा सूर आणि हावभाव वेगळा वाटला. "शाब्बास इंडिया, ट्रॉफी घरी घेऊन जात आहेस," असे त्याने म्हटले. स्पर्धेदरम्यान भारताबद्दलची अनेक भाकिते आमिरची खोटी ठरल्याने त्याला ट्रोल करण्यात आले होते. "भारत जिंकला, भाकित चुकीची होती का?" या प्रश्नावर आमिर म्हणाला, "भारताच्या टॉप तीन फलंदाजांनी जी धडाकेबाज फलंदाजी केली, त्यामुळे गेम न्यूझीलंडच्या हातातून निघून गेला." त्याने अभिषेक शर्माचेही कौतुक केले. आमिरच्या या प्रतिक्रियेनंतर सोशल मीडियावर चर्चेला उधाण आले आहे.