शिंदेंच्या भाषणादरम्यान फडणवीसांची एन्ट्री, एका वाक्यात वाद संपवला; सातारा राड्याने विधिमंडळ गदगदले

  अधिवेशन सोडून एकनाथ शिंदे तातडीने दिल्लीला; भाजप नेतृत्वासोबत जागावाटप आणि 'त्या' रिपोर्टवर खलबतं

 तीन निवडणुकांत मित्रपक्षांच्या असहकार्याचा अहवाल भाजपकडे सादर होणार?; शिवसेना खासदार आणि वकिलांशीही महत्त्वाची बैठक

मुंबई: राज्यात विधिमंडळाचे अर्थसंकल्पीय अधिवेशन सुरू असतानाच उपमुख्यमंत्री एकनाथ शिंदे यांनी अचानक दिल्ली गाठल्याने राजकीय वर्तुळात चर्चांना उधाण आले आहे. भाजपच्या वरिष्ठ नेत्यांशी जागावाटप आणि युतीतील समन्वयाबाबत चर्चा करण्यासाठी ते दिल्ली दौऱ्यावर गेले असून, या दौऱ्यात एक महत्त्वाचा अहवालही सादर होण्याची शक्यता आहे.

शिवसेना खासदारांसोबत बैठक

दिल्लीत पोहोचल्यानंतर उपमुख्यमंत्री एकनाथ शिंदे यांनी केंद्रीय अधिवेशनात सहभागी झालेल्या शिवसेना खासदारांची तातडीची बैठक बोलावली. खासदार डॉ. श्रीकांत शिंदे यांच्या निवासस्थानी पार पडलेल्या या बैठकीत अधिवेशनादरम्यान पक्षाची भूमिका आणि रणनीती याबाबत मार्गदर्शन करण्यात आले. युद्धजन्य परिस्थितीच्या पार्श्वभूमीवर केंद्र सरकारच्या धोरणांना पाठिंबा देतानाच विरोधकांच्या 'फेक नॅरेटिव्ह'चा पर्दाफाश करण्याचा निर्णय बैठकीत घेण्यात आला.

मित्रपक्षांच्या असहकार्याचा अहवाल

सूत्रांनी दिलेल्या माहितीनुसार, शिंदे गटाने मागील तीन निवडणुकांमध्ये मित्रपक्षांनी केलेल्या असहकार्याचा तपशीलवार अहवाल तयार केला आहे. अनेक मतदारसंघांत भाजपसह अन्य मित्रपक्षांच्या उमेदवारांनी शिवसेनेच्या उमेदवारांना हरवण्यासाठीच काम केल्याचा ठपका या अहवालात असल्याचे कळते. हा अहवाल उपमुख्यमंत्री एकनाथ शिंदे भाजपच्या वरिष्ठ नेत्यांसमोर मांडू शकतात.

वकिलांशीही चर्चा होणार

याशिवाय, सर्वोच्च न्यायालयात शिवसेना पक्ष आणि धनुष्यबाण चिन्हाबाबत सुरू असलेल्या खटल्याचा आढावा घेण्यासाठी उपमुख्यमंत्री वकिलांचीही भेट घेणार आहेत. शिवसेनेची न्यायालयीन लढाई आणि त्यातील अद्ययावत परिस्थिती याबाबत ते माहिती घेणार आहेत.

फडणवीसही दिल्ली दौऱ्यावर

दरम्यान, मुख्यमंत्री देवेंद्र फडणवीस हे बुधवारी दिल्ली दौऱ्यावर जाणार असून, केंद्रीय संचलन समितीच्या बैठकीत ते सहभागी होणार आहेत. पाच राज्यांतील निवडणुकांच्या पार्श्वभूमीवर तिकीट वाटपाबाबतही यावेळी चर्चा होण्याची शक्यता आहे. उपमुख्यमंत्री एकनाथ शिंदे यांच्या दिल्ली दौऱ्यानंतर मुख्यमंत्रीही दिल्लीला जात असल्याने युतीतील समन्वय आणि आगामी निवडणुकांच्या तयारीबाबत महत्त्वाचे निर्णय होऊ शकतात.