वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

 

अधिवेशनात सुनेत्रा पवारांची 'मौनाची' रणनीती? स्वतःच्याच खात्यांच्या प्रश्नांवर उत्तरं देणार नाहीत; 'या' दोन मंत्र्यांकडे सोपवली जबाबदारी

​मुंबई: राज्याच्या अर्थसंकल्पीय अधिवेशनाचे पडघम वाजत असतानाच, सत्ताधारी गोटातून एक अत्यंत महत्त्वाची आणि अनपेक्षित माहिती समोर आली आहे. राज्याच्या नवनियुक्त उपमुख्यमंत्री सुनेत्रा पवार या त्यांच्याकडे असलेल्या तीन महत्त्वाच्या खात्यांशी संबंधित प्रश्नांची उत्तरे या अधिवेशनात स्वतः देणार नाहीत. विशेष म्हणजे, अजित पवार यांच्या निधनानंतर उपमुख्यमंत्रीपदाची धुरा सांभाळणाऱ्या सुनेत्रा पवार यांचे हे पहिलेच अधिवेशन असल्याने, सभागृहात त्या विरोधकांच्या प्रश्नांना कशा प्रकारे सामोरे जातात, याकडे संपूर्ण महाराष्ट्राचे लक्ष लागले होते. मात्र, आता ही जबाबदारी इतर अनुभवी मंत्र्यांच्या खांद्यावर सोपवण्यात आली आहे.

​मिळालेल्या माहितीनुसार, सुनेत्रा पवार यांच्याकडे सध्या क्रीडा व युवक कल्याण, अल्पसंख्याक विकास आणि राज्य उत्पादन शुल्क ही तीन महत्त्वाची खाती आहेत. यापैकी क्रीडा आणि अल्पसंख्याक विभागाशी संबंधित प्रश्नांना सभागृहात उत्तर देण्याची जबाबदारी मंत्री दत्तात्रय भरणे यांच्यावर सोपवण्यात आली आहे. तर, राज्य उत्पादन शुल्क विभागाशी संबंधित प्रश्नांचा भार मंत्री हसन मुश्रीफ सांभाळणार आहेत. या निर्णयामुळे सुनेत्रा पवार या अधिवेशनादरम्यान सभागृहात बोलण्याची शक्यता आता धूसर झाली असून, त्या केवळ उपस्थित राहून कामकाजाचे निरीक्षण करण्याची शक्यता वर्तवण्यात येत आहे.

​अजित पवार यांच्या अकाली निधनानंतर राज्याच्या राजकारणात मोठी पोकळी निर्माण झाली होती. त्यानंतर सुनेत्रा पवार यांनी उपमुख्यमंत्रीपदाची शपथ घेत या आव्हानात्मक काळात जबाबदारी स्वीकारली. अजित पवारांकडे असलेली बहुतांश खाती सुनेत्रा पवार यांच्याकडे सोपवण्यात आली, तरी महत्त्वाचे अर्थ खाते मात्र मुख्यमंत्री देवेंद्र फडणवीस यांनी स्वतःकडे ठेवले आहे. नव्या मंत्र्यांना सभागृहातील कामकाजाचा सराव व्हावा किंवा तांत्रिक पेच टाळावा, या उद्देशाने हा कामाच्या वाटपाचा निर्णय घेतल्याचे बोलले जात आहे.

​संसदीय कामकाजात नवीन मंत्र्यांना सुरुवातीच्या काळात अभ्यासासाठी वेळ दिला जातो, असा संकेत असला तरी, उपमुख्यमंत्र्यांसारख्या महत्त्वाच्या पदावरील व्यक्तीने स्वतःच्या खात्यावर बोलणे टाळल्यामुळे राजकीय वर्तुळात चर्चांना उधाण आले आहे. विरोधक या मुद्द्यावरून सरकारला घेरण्याची शक्यता नाकारता येत नाही. सुनेत्रा पवार या आगामी काळात आपल्या खात्यांवर कशा प्रकारे पकड मिळवतात आणि सभागृहात कधी सक्रिय होतात, हे पाहणे औत्सुक्याचे ठरेल.