वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

 ट्रम्प यांचे तेल ग्राहक देशांना आवाहन: होर्मुझच्या सामुद्रधुनीत एकत्र येऊन पेट्रोलिंग करा; जहाजांना संरक्षण देणार

 होर्मुझच्या सामुद्रधुनीत जहाजांना संरक्षण देण्यासाठी एकत्र येण्याचे डोनाल्ड ट्रम्प यांचे आवाहन

 चीनचे ९० टक्के तेल होर्मुझमधून जाते, त्यामुळे इतर देशांनीही लष्कर तैनात करावे - ट्रम्प

 इराणचे हवाई दल नष्ट केल्याचा दावा; नव्या सर्वोच्च नेत्याचा सामुद्रधुनी बंद करण्याचा इशारा

वॉशिंग्टन: इराण-इस्रायल-अमेरिका युद्धाला १७ दिवस पूर्ण झाले असताना अमेरिकेचे अध्यक्ष डोनाल्ड ट्रम्प यांनी जागतिक तेल ग्राहक देशांना मोठे आवाहन केले आहे. होर्मुझच्या सामुद्रधुनीत (Strait of Hormuz) एकत्र येऊन पेट्रोलिंग करण्याचा प्रस्ताव त्यांनी दिला असून, या मार्गावरून जाणाऱ्या जहाजांना संरक्षण देण्याची तयारी अमेरिकेने दर्शवली आहे.

चीनचे ९० टक्के तेल होर्मुझमधून

डोनाल्ड ट्रम्प म्हणाले, "होर्मुझच्या सामुद्रधुनीत आम्ही जहाजांना संरक्षण देणार आहोत. आम्ही अनेक देशांशी याबाबत चर्चा करत आहोत. या देशांनाच सुरक्षेची सर्वात जास्त गरज आहे. आम्ही फक्त १ टक्के तेल होर्मुझमधून आणतो, तर चीनचे ९० टक्के तेल या मार्गावरून जाते. त्यामुळे इतर देशांनीही तिथे लष्कर तैनात करावे, आम्ही त्यांना मदत करू."

इराणचे हवाई दल नष्ट केले

इराणविरुद्ध मोठा दावा करताना ट्रम्प म्हणाले, "आम्ही इराणला हरवले आहे. इराणचे हवाई दल, हवाई यंत्रणा नष्ट केली आहे. संरक्षणासाठी इराणकडे आता काहीही शिल्लक राहिलेले नाही. इराणच्या सर्वोच्च नेत्यालाही आम्ही संपवले आहे. खर्गवरही आम्ही हल्ला केला." तसेच चर्चेबाबत बोलताना त्यांनी इराणला चर्चा करण्याची इच्छा असल्याचे सांगितले, परंतु ते अद्याप त्यासाठी तयार नसल्याचे म्हटले.

इराणचा इस्रायलवर मोठा क्षेपणास्त्र हल्ला

दरम्यान, इराणने इस्रायलवर मोठ्या प्रमाणात क्षेपणास्त्र हल्ला केला आहे. या हल्ल्यात बॅलिस्टिक आणि क्रूझ क्षेपणास्त्रांचा वापर करण्यात आला असून, प्रामुख्याने इस्रायलमधील लष्करी तळांना लक्ष्य करण्यात आले आहे. इराणकडून 'सेज्जील' बॅलिस्टिक क्षेपणास्त्रेही डागण्यात आली आहेत, ज्यामुळे तेल अवीवसह मध्य इस्रायलमधील अनेक शहरांमध्ये धोक्याचे सायरन वाजवले जात आहेत.

इराणच्या नव्या सर्वोच्च नेत्याचा इशारा

अमेरिकेचे अध्यक्ष डोनाल्ड ट्रम्प यांनी पुढील आठवडाभर इराणवर जोरदार हल्ले केले जातील, असे संकेत दिले आहेत. जी-७ देशांच्या नेत्यांसोबत झालेल्या बैठकीत इराण लवकरच शरण येईल, असा दावा ट्रम्प यांनी केल्याची माहिती आहे. मात्र इराणच्या नव्या सर्वोच्च नेत्याने युद्ध सुरूच ठेवण्याची भूमिका घेतली असून, होर्मूजची सामुद्रधुनी बंद करण्याचा इशारा दिला आहे. यामुळे जागतिक अर्थव्यवस्थेवर मोठा परिणाम होण्याची भीती व्यक्त केली जात आहे.