वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

 राज्यसभेच्या एका जागेवर मविआत रस्सीखेच; आदित्य ठाकरे म्हणाले, "अजून चर्चा सुरू, निर्णय झाला नाही."

मुंबई : महाराष्ट्रातील राज्यसभेच्या सहा जागांसाठी १६ मार्चला होत असलेल्या निवडणुकीपूर्वी महाविकास आघाडीतील (मविआ) जागावाटपाबाबत अद्याप संभ्रम कायम आहे. मविआच्या वाट्याला येणाऱ्या एका जागेसाठी राष्ट्रवादी काँग्रेस (शरदचंद्र पवार) गटाकडून ज्येष्ठ नेते शरद पवार यांच्या नावाची जोरदार चर्चा सुरू असतानाच, शिवसेना (उद्धव बाळासाहेब ठाकरे) पक्षाकडूनही ही जागा आपल्यालाच मिळावी, यासाठी आग्रही भूमिका घेतली जात आहे. अखेर या पार्श्वभूमीवर शिवसेनेचे नेते आदित्य ठाकरे यांनी सोशल मीडियावर पोस्ट करत मोठे वक्तव्य केले आहे.

आदित्य ठाकरे यांनी स्पष्ट केले की, राज्यसभेच्या या जागेबाबत अद्याप कोणताही अंतिम निर्णय झालेला नाही. मविआमधील नेत्यांमध्ये याबाबत चर्चा सुरू आहे. "राज्यसभेच्या जागेबाबत अजून काहीही अंतिम झालेले नाही. महाविकास आघाडीचे सर्व नेते एकत्र येऊन यावर चर्चा करून लवकरच निर्णय घेतील," असे त्यांनी म्हटले आहे. त्यामुळे शरद पवार यांच्या नावावर शिक्कामोर्तब झाल्याच्या येऊ घातलेल्या बातम्यांना आदित्य ठाकरे यांनी पूर्णविराम दिला आहे.

दरम्यान, राष्ट्रवादीच्या नेत्या सुप्रिया सुळे आणि ज्येष्ठ नेते जयंत पाटील यांनी उद्धव ठाकरे यांची नुकतीच भेट घेतली. या भेटीत शरद पवार यांच्या उमेदवारीला शिवसेनेने पाठिंबा द्यावा, अशी मागणी राष्ट्रवादीकडून करण्यात आल्याचे सूत्रांनी सांगितले. मात्र, अद्याप यावर सहमती झाल्याचे वृत्त नाही. काँग्रेसकडूनही शिवसेनेला ही जागा सोडून विधानपरिषदेची जागा घेण्याची ऑफर देण्यात आल्याची माहिती आहे. त्यामुळे आता मविआच्या या एकमेव राज्यसभेच्या जागेवरून तिघांमध्ये रस्सीखेच सुरू असल्याचे स्पष्ट झाले आहे.