वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

ज्येष्ठ नागरिकांसाठी महत्त्वाची बातमी! निवृत्तीनंतर आपत्कालीन परिस्थितीत कुठून आणावे पैसे? जाणून घ्या पर्याय

नवी दिल्ली: निवृत्तीनंतर नियमित उत्पन्न बंद होते मात्र दैनंदिन खर्च सुरूच राहतो. अशा परिस्थितीत वैद्यकीय आपत्कालीन किंवा इतर गरजांसाठी अचानक मोठ्या रकमेची आवश्यकता निर्माण झाल्यास ज्येष्ठ नागरिकांसमोर मोठे आव्हान उभे राहते. नियमित उत्पन्न नसल्याने बँकांकडून वैयक्तिक कर्ज मिळवणे कठीण जाते. मात्र, योग्य माहिती आणि नियोजनाने आर्थिक ताण कमी करता येऊ शकतो. निवृत्तीनंतर आपत्कालीन परिस्थितीत उपलब्ध असलेल्या पर्यायांविषयी जाणून घेऊयात.

१. मुदत ठेवीवर (एफडी) कर्जाचा पर्याय

जर तुमच्याकडे बँकेत मुदत ठेव असेल, तर गरज पडल्यास ती न मोडता तुम्ही तिच्या आधारे कर्ज घेऊ शकता. बँका एफडीला तारण म्हणून स्वीकारतात आणि त्यावर कर्ज देतात. या कर्जावरील व्याजदर हा एफडीवरील परताव्यापेक्षा किंचित जास्त असतो, मात्र प्रक्रिया अगदी सोपी असते. कागदपत्रांची अल्प आवश्यकता असल्याने हा पर्याय निवृत्त व्यक्तींसाठी अत्यंत सोयीचा आहे. बँका सामान्यतः मुदत ठेव रकमेच्या ८० ते ९० टक्के रक्कम कर्ज म्हणून मंजूर करतात.

२. सोने तारण ठेवून कर्ज

ज्येष्ठ नागरिकांसाठी सोने कर्ज हा देखील एक प्रभावी पर्याय ठरू शकतो. घरातील सोन्याचे दागिने तारण ठेवून तुम्ही अगदी कमी कालावधीत कर्ज मिळवू शकता. गोल्ड लोनवरील व्याजदर सामान्यतः असुरक्षित वैयक्तिक कर्जांपेक्षा कमी असतो, ज्यामुळे हा पर्याय अधिक किफायतशीर ठरतो. कर्जाचे हप्ते वेळेवर भरल्यास तुमचे सोने पूर्णपणे सुरक्षित राहते. पैसे परत केल्यानंतर तुम्ही तुमचे सोने परत मिळवू शकता.

३. मालमत्ता गहाण ठेवून कर्ज

जर तुमच्या नावावर घर किंवा इतर कोणतीही मालमत्ता असेल आणि तुम्हाला मोठ्या प्रमाणात पैशांची आवश्यकता असेल, तर ती मालमत्ता गहाण ठेवून कर्ज घेण्याचा पर्याय उपलब्ध आहे. याला बँका सुरक्षित कर्ज मानतात, त्यामुळे व्याजदर सामान्यतः वैयक्तिक कर्जापेक्षा कमी असतो. या पर्यायामुळे मोठी रक्कम दीर्घ मुदतीसाठी उपलब्ध होऊ शकते. मात्र, हप्ते न भरल्यास मालमत्ता जप्त होण्याचा धोका लक्षात घेऊनच हा निर्णय घ्यावा.

निवृत्तीनंतर आर्थिक नियोजनाचे महत्त्व

तज्ज्ञांच्या मते, निवृत्तीपूर्वीच आपत्कालीन निधीचे नियोजन करणे गरजेचे आहे. निवृत्तीनंतर आपत्कालीन परिस्थितीत त्रास होऊ नये यासाठी आधीपासून बचतीचे नियोजन, विमा संरक्षण आणि गुंतवणुकीचे योग्य पर्याय निवडणे महत्त्वाचे ठरते. वरीलपैकी कोणताही पर्याय वापरण्यापूर्वी बँकेशी संपर्क साधून व्याजदर आणि अटी समजून घेणे फायदेशीर ठरेल.