वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

"दुबळ्या संघांसमोर वाघ, मोठ्यांसमोर बेकार"; पाकिस्तानच्या विश्वचषकातील दमदार सुरुवातीवर इरफान पठाणचा टोमणा

- नामिबियाविरुद्ध 102 धावांनी विजय; सुपर-8 मध्ये प्रवेश नक्की, मात्र मोठ्या संघांविरुद्धच्या कामगिरीवर प्रश्नचिन्ह

नवी दिल्ली: आयसीसी टी-20 विश्वचषक 2026 मध्ये पाकिस्तानने नामिबियाविरुद्ध दणदणीत विजय मिळवत सुपर-8 फेरीत प्रवेश केला आहे. मात्र या विजयानंतर भारताचे माजी अष्टपैलू इरफान पठाण यांनी केलेल्या टिप्पणीमुळे क्रिकेटविश्वात नवा वाद पेटला आहे.

नामिबियाविरुद्धच्या सामन्यात पाकिस्तानने सर्वच विभागांत वर्चस्व गाजवत तब्बल 102 धावांनी विजय मिळवला. फलंदाजी, गोलंदाजी आणि क्षेत्ररक्षण या तिन्ही आघाड्यांवर संघाने शानदार कामगिरी केली. या विजयामुळे पाकिस्तानचे सुपर-8 मधील स्थान निश्चित झाले आहे.

इरफान पठाणचा सट्टेबाज टोमणा

सामन्यानंतर समालोचनादरम्यान इरफान पठाण यांनी पाकिस्तानच्या कामगिरीवर भाष्य करताना एक वक्तव्य केले ज्याची चर्चा सोशल मीडियावर जोर धरू लागली आहे. ते म्हणाले, "दुबळ्या संघांसमोर आणि खालच्या क्रमांकाच्या संघांविरुद्ध पाकिस्तान संघ हा खूप मजबूत वाघ दिसतो." पठाणच्या या वक्तव्याचा अनेकांनी पाकिस्तानच्या वेगवेगळ्या प्रतिस्पर्ध्यांसमोरील कामगिरीवर टोमणा म्हणून अर्थ लावला आहे.

लहान संघांविरुद्ध तुफान, मोठ्यांसमोर शांत का?

या स्पर्धेत पाकिस्तानने नेदरलँड्स, अमेरिका आणि नामिबिया यांसारख्या दुबळ्या संघांवर सहज मात केली आहे. मात्र, गटातील महत्त्वाच्या सामन्यात भारताविरुद्ध त्यांना एकतर्फी पराभव पत्करावा लागला. यामुळे पाकिस्तानच्या सातत्यावर प्रश्नचिन्ह उपस्थित होत आहे. लहान संघांविरुद्ध आक्रमक आणि आत्मविश्वासपूर्ण खेळ दाखवणारा पाकिस्तान, बलाढ्य प्रतिस्पर्ध्यांसमोर मात्र अनेकदा लय गमावताना दिसतो. दबावाच्या क्षणी निर्णयक्षमता आणि सातत्य या बाबतीत संघ कमी पडतो, अशी टीका वारंवार होत असते.

सुपर-8 मध्ये खऱ्या अर्थाने अग्निपरीक्षा

सुपर-8 फेरीत पाकिस्तानसमोर खऱ्या अर्थाने आव्हान उभे राहणार आहे. या टप्प्यात त्यांचा सामना न्यूझीलंड, इंग्लंड आणि श्रीलंका यांसारख्या मजबूत संघांशी होणार आहे. २१ फेब्रुवारीपासून सुरू होणाऱ्या सुपर-8 फेरीत पाकिस्तानचा पहिला सामना न्यूझीलंडविरुद्ध होईल. आता पाकिस्तानला हे सिद्ध करावे लागेल की त्यांची दमदार कामगिरी ही केवळ दुबळ्या संघांपुरती मर्यादित नसून मोठ्या संघांविरुद्धही ते तितकेच प्रभावी ठरू शकतात की नाही. पठाणच्या वक्तव्यामुळे या सामन्यांकडे पाहण्याचा उत्सुकता आणखी वाढली आहे.