वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

 प्रेमसंबंधातून खून; मैत्रिणीशी दुसरा तरुण बोलल्याचा संशय, संतप्त प्रियकराने केलं काळोखात

- नाशिकच्या जंगलात मिळालेल्या तरुणीच्या मृतदेहाचा उलगडा, आरोपी मूळचा बुलढाण्याचा; की-चेनवरील 'संस्कृती' नावाने पोलिसांपर्यंत पोहोचला तपासाचा धागा

नाशिक/बुलढाणा: शहरापासून दूर वाडीवऱ्हे येथील सारूळच्या जंगलात रक्ताच्या थारोळ्यात आढळलेल्या तरुणीच्या खुनाचा छडा नाशिक ग्रामीण पोलिसांनी अवघ्या काही तासांत लावला आहे. हा खून प्रेमसंबंधातून झाल्याचे उघडकीस आले असून, आरोपी आणि मृत तरुणी दोघेही बुलढाणा जिल्ह्यातील रहिवासी आहेत. आरोपीने मैत्रिणीशी दुसऱ्या तरुणाशी बोलणे झाल्याच्या संशयातून हा क्रूर खून केल्याचे तपासात समोर आले आहे.

मृत तरुणीचे नाव संस्कृती सतीश काळे (वय २०) असून ती बुलढाणा जिल्ह्यातील रहिवासी होती. तिचा मृतदेह शुक्रवारी सारूळच्या जंगलात आढळून आला होता. तिच्या गळ्यात चाकू खुपसल्याचे उघडकीस आले असून त्या ठिकाणी मोठ्या प्रमाणात रक्त सांडलेले होते.

की-चेन ठरली आरोपीपर्यंत पोहोचण्याचा दुवा

मृतदेहाजवळ कोणतीही ओळख पटवणारी साधने नव्हती. मात्र पोलिसांना तिच्याजवळ एक चावी आणि त्याला लावलेली की-चेन आढळली. त्या की-चेनवर 'संस्कृती' असे नाव कोरलेले होते. या एका धाग्याला हात धरत पोलिसांनी राज्यभर बेपत्ता तरुणींची माहिती जुळवण्यास सुरुवात केली. यादरम्यान बुलढाणा जिल्ह्यातील संस्कृती काळे ही मुलगी बेपत्ता असल्याचे समोर आले. पोलिसांनी तिच्या वडिलांशी संपर्क साधून छायाचित्रांच्या आधारे मृतदेहाची ओळख पटवली.

संशयावरून रचला कट

पुढील तपासात संस्कृतीच्या ओळखीतील अथर्व देशमुख (बुलढाणा) याच्यावर संशयाची सुई केंद्रित झाली. अथर्व हा नाशिकमधील एका खासगी महाविद्यालयात शिक्षण घेत असून तो काही दिवसांपूर्वी बुलढाण्याला गेला होता. यादरम्यान त्याने आपल्या मित्रासह संस्कृतीला भेटून कारमध्ये फिरायला नेले.

पोलिसांनी केलेल्या चौकशीत अथर्वने सांगितले की, त्याचा संस्कृतीशी प्रेमसंबंध होता. मात्र, ती दुसऱ्या एका तरुणाशी बोलत असल्याचे दिसल्याने त्याला प्रचंड राग आला. याच संतापातून त्याने खुनाचा कट रचला. कारमध्ये दोघांमध्ये झालेल्या वादात त्याने चाकूने तिच्यावर वार केले. जखमी झालेल्या संस्कृतीने तेथेच प्राण सोडले.

नाशिकच्या जंगलात टाकला मृतदेह

खून केल्यानंतर मृतदेह लपविण्यासाठी अथर्वने आपल्या मित्रासह नाशिककडे धाव घेतली. त्याने वाडीवऱ्हे परिसरातील दुर्गम जंगल निवडले आणि तेथे मृतदेह टाकून दिला. घटनेची माहिती मिळताच पोलीस निरीक्षक भगवान मथुरे यांच्या पथकाने तपासाला सुरुवात केली. अथर्व सिन्नर, कोपरगाव आणि नाशिक शहर परिसरात फिरत असल्याची माहिती मिळताच नाशिक शहर पोलिसांच्या मदतीने त्याला त्याच्या साथीदारासह ताब्यात घेण्यात आले. कसून चौकशी केल्यानंतर अखेर त्याने आपला गुन्हा कबूल केला.

या घटनेने नाशिकसह बुलढाणा जिल्ह्यात खळबळ उडाली आहे. तरुणांच्या वाढत्या गुन्हेगारी प्रवृत्तीवर पुन्हा एकदा प्रश्नचिन्ह उपस्थित झाले असून, पोलिसांनी दोन्ही आरोपींवर गुन्हा दाखल करून पुढील तपास सुरू केला आहे.