वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

 चिनी रोबोटिक डॉग 'ओरियन'च्या नावाने विक्री; गालगोटिया विद्यापीठाचा AI समिटमध्ये पर्दाफाश, स्टॉल बंद करण्याचे आदेश

नवी दिल्ली: दिल्लीत सुरू असलेल्या AI इम्पॅक्ट समिटमध्ये ग्रेटर नोएडाच्या गालगोटिया विद्यापीठाला मोठ्या वादानंतर आपला स्टॉल तातडीने रिकामा करण्याचे आदेश देण्यात आले आहेत. चिनी कंपनीच्या रोबोटिक कुत्र्याला स्वतःचे उत्पादन म्हणून सादर केल्याप्रकरणी ही कारवाई करण्यात आली.

सोशल मीडियावर व्हायरल झालेल्या व्हिडिओमध्ये विद्यापीठाच्या प्राध्यापिका डॉ. नेहा सिंह या 'ओरियन' नावाच्या रोबोटिक डॉगचे प्रदर्शन करताना दिसत आहेत. या प्रदर्शनात त्या दावा करत आहेत की, हा रोबोटिक कुत्रा विद्यापीठाच्या सेंटर ऑफ एक्सलन्सने विकसित केला आहे. मात्र, तंत्रज्ञान क्षेत्रातील तज्ज्ञांनी हा दावा फेटाळून लावत हा रोबोट चीनच्या युनिट्री रोबोटिक्स कंपनीचा 'Go2' मॉडेल असल्याचे स्पष्ट केले. हा रोबोट भारतीय बाजारात सहज उपलब्ध असून त्याची किंमत २ ते ३ लाख रुपयांच्या दरम्यान आहे.

वाद वाढताच गालगोटिया विद्यापीठाला एक्स्पो रिकामा करण्याचे आदेश देण्यात आले. याप्रकरणी विद्यापीठाच्या प्राध्यापिका डॉ. ऐश्वर्या श्रीवास्तव यांनी स्पष्टीकरण दिले की, "आम्ही कधीच हा रोबोट तयार केल्याचा दावा केला नव्हता. तो आमच्या AI गुंतवणुकीचा एक भाग होता आणि त्याबाबत गैरसमज झाला." विद्यापीठाने अधिकृत निवेदन जारी करून आपल्यावर होत असलेल्या अपप्रचाराबद्दल खंत व्यक्त केली आहे. विद्यापीठाच्या म्हणण्यानुसार, जागतिक स्तरावर उपलब्ध साधनांचा वापर करून विद्यार्थ्यांना AI ऍप्लिकेशन्सचे प्रशिक्षण देण्याच्या प्रयत्नांचा हा एक भाग होता.

दरम्यान, या प्रकरणाने आता राजकीय वातावरणही तापले आहे. काँग्रेसने या प्रकरणावरून केंद्र सरकारवर निशाणा साधला आहे. काँग्रेस नेते राहुल गांधी यांनी टीका करताना म्हटले की, "चीनच्या रोबोटला भारताचे उत्पादन म्हणून सादर करून जागतिक स्तरावर देशाची थट्टा करण्यात आली आहे. ही समिट केवळ एक PR तमाशा बनली असून भारतीय प्रतिभेला वाव न देता चिनी उत्पादनांचे प्रदर्शन करण्यात येत आहे." काँग्रेसच्या आरोपानुसार, या संपूर्ण प्रकरणामुळे चिनी माध्यमांमध्येदेखील भारतावर टीका होत आहे.