अंगावर खाकी, खांद्यावर स्टार अन् दाखवत होती रुबाब; पुण्यात तोतया ‘लेडी सिंघम’चा पर्दाफाश, नेमकं काय घडलं?

भीमा नदीपात्रात पोलिसांची धडक कारवाई; ४७ लाखांच्या मुद्देमालासह 'सँड लॉबी' गजाआड, पंढरपुरात खळबळ!

पंढरपूर (क्रांती न्यूज विशेष प्रतिनिधी):

तालुक्यातील आंबे आणि शेगाव दुमाला परिसरातील भीमा नदीपात्रात सुरू असलेल्या अवैध वाळू उपसा आणि वाहतुकीवर पंढरपूर तालुका पोलिसांनी मोठी धडक कारवाई केली आहे. या धडाकेबाज छाप्यात वाळू उपशासाठी वापरण्यात येणारी यारी, टिप्पर, टेम्पो, ट्रॅक्टर आणि तब्बल १३० ब्रास वाळूसह सुमारे ४६ लाख ३० हजार रुपयांचा मुद्देमाल जप्त करण्यात आला आहे. पोलिसांच्या या कारवाईमुळे तालुक्यातील वाळू माफियांचे धाबे दणाणले आहेत.

सिनियर पोलीस निरीक्षक टी. वाय. मुजावर यांनी दिलेल्या माहितीनुसार, भीमा नदीपात्रातून मोठ्या प्रमाणावर बेकायदेशीर वाळू उपसा होत असल्याची गोपनीय माहिती पोलिसांना मिळाली होती. या माहितीच्या आधारे पोलिसांनी वेगवेगळ्या ठिकाणी छापे टाकले.

पहिली कारवाई: शेगाव दुमाला

पोलिसांनी सर्वप्रथम शेगाव दुमाला (ता. पंढरपूर) येथील भीमा नदीपात्रालगत सुरू असलेल्या वाळू उपशाच्या अड्ड्यावर छापा टाकला. या कारवाईत:

 एक टेम्पो

 एक ट्रॅक्टर

 वाळू उपशासाठी वापरण्यात येणारी यारी (मशीन)

 एकूण जप्त मुद्देमाल: ११ लाख ५० हजार रुपये.

दुसरी कारवाई: आंबे गाव

त्यानंतर पोलिसांनी आंबे (ता. पंढरपूर) गावच्या परिसरात धाड टाकून मोठी कारवाई केली. येथे वाळूचा मोठा साठा आणि वाहन जप्त करण्यात आले:

 १२५ ब्रास बेकायदेशीर वाळू साठा (किंमत ७ लाख ५० हजार रुपये)

 एक मोठा टिप्पर (किंमत २७ लाख रुपये)

 *टिप्परमधील ५ ब्रास वाळू (किंमत ३० हजार रुपये)

 एकूण जप्त मुद्देमाल: ३४ लाख ८० हजार रुपये.

या दोन्ही कारवाया मिळून पोलिसांनी एकूण ४६ लाख ३० हजार रुपयांचा मुद्देमाल जप्त केला असून, संबंधित टेम्पो, ट्रॅक्टर आणि टिप्परचे चालक, मालक तसेच अवैधरीत्या वाळू उपसा करणाऱ्यांवर पंढरपूर तालुका पोलीस ठाण्यात गुन्हा दाखल करण्याची प्रक्रिया सुरू आहे.

वरिष्ठ पोलीस अधिकाऱ्यांच्या मार्गदर्शनाखाली कारवाई ही यशस्वी कामगिरी सोलापूरचे पोलीस अधीक्षक अतुल कुलकर्णी, अतिरिक्त पोलीस अधीक्षक विजय कबाडे आणि सहाय्यक पोलीस अधीक्षक प्रशांत डगळे यांच्या मार्गदर्शनाखाली करण्यात आली. कारवाईत वरिष्ठ पोलीस निरीक्षक टी. वाय. मुजावर, सहाय्यक पोलीस निरीक्षक शहाजी गोसावी, अक्षय सोनवणे, पोलीस उपनिरीक्षक विक्रम वडणे आणि पोलीस पथकाने थेट सहभाग घेतला.

विष्णुपद बंधाऱ्याच्या दरवाजांवरून वाद?

या वाळू उपशाच्या पार्श्वभूमीवर पंढरपुरातील चंद्रभागा नदीवरील विष्णुपद बंधाऱ्याचे दरवाजे अवैध वाळू उपसा करणाऱ्यांनी संगनमताने काढून टाकल्याचा खळबळजनक आरोप 'महर्षी वाल्मीकी संघाचे' संस्थापक गणेश अंकुशराव यांनी केला आहे.

मात्र, भीमा पाटबंधारे विभागाचे कार्यकारी अभियंता गणेश कथले यांनी हा आरोप पूर्णपणे फेटाळून लावला आहे. बंधाऱ्याचे काही दरवाजे हे केवळ तांत्रिक कारणांमुळे आणि दुरुस्तीसाठी अद्याप बसवायचे बाकी आहेत, त्याचा वाळू उपशाशी संबंध नाही, असे स्पष्टीकरण पाटबंधारे विभागाने दिले आहे.