म्हसवड : धुळदेवमध्ये भयानक अपघात, दोघे जागीच ठार; तीन जखमी

 खुनानंतर आरोपी स्वतः पोलीस ठाण्यात गेला; पाच वर्षांपासून डेटिंग ॲपद्वारे झाली होती भेट

विशाखापट्टणम : आंध्र प्रदेशातील विशाखापट्टणम येथे एका विवाहित नौदल कर्मचाऱ्याने आपल्या प्रेयसीची निर्घृण हत्या करून तिच्या शरीराचे तुकडे केल्याची धक्कादायक घटना समोर आली आहे. आरोपीने मृतदेहाचे तीन तुकडे केले. एक तुकडा फ्रिजमध्ये लपवला, दुसरा पोत्यात घालून पलंगाखाली ठेवला, तर तिसरा म्हणजे शीर निर्जन ठिकाणी नेऊन जाळून टाकले. घटनेच्या वेळी आरोपीची पत्नी तिच्या माहेरी होती. हत्येनंतर आरोपी स्वतः पोलीस ठाण्यात गेला आणि त्याने गुन्ह्याची कबुली दिली.

नेमकं काय घडलं?

पोलिसांनी दिलेल्या माहितीनुसार, आरोपी चिंताडा रवींद्र (३५) हा आयएनएस देगा येथे तैनात असलेला नौदल कर्मचारी आहे. रवींद्रने रविवारी दुपारी आपली २९ वर्षीय प्रेयसी मोनिकाला घरी बोलावले होते. त्याच दिवशी संध्याकाळी त्यांच्यात वाद झाला, ज्यातून ही हत्या घडली. पोलिसांच्या तपासात असे उघड झाले की, रवींद्रने मोनिकावर चाकूने वार करून तिची हत्या केली.

डेटिंग ॲपवरून झाली होती भेट

रवींद्र आणि मोनिका यांची २०२१ मध्ये एका डेटिंग ॲपद्वारे भेट झाली होती. त्यानंतर त्यांच्यात नातेसंबंध निर्माण झाले. ते विशाखापट्टणममधील विविध ठिकाणी भेटत असत. रवींद्रची पत्नी काही दिवसांपूर्वी विजयनगरम येथील तिच्या माहेरी गेली होती. त्याचवेळी त्याने मोनिकाला घरी बोलावले.

३.५ लाख रुपयांचा वाद

पोलिसांच्या म्हणण्यानुसार, रवींद्रचा दावा आहे की मोनिकाने त्याच्याकडून ३.५ लाख रुपये उसने घेतले होते. ती त्यांच्या नात्याबद्दल सर्व काही उघड करण्याची वारंवार धमकी देत असे. हा एक नेहमीचा मुद्दा होता ज्यामुळे दोघांमध्ये वारंवार वाद होत असत. रवींद्रने तिला ठार मारण्याच्या उद्देशाने चाकू खरेदी करण्यासाठी दुकान गाठले; मात्र तेथे चाकू न मिळाल्याने त्याने ऑनलाइन ऑर्डर केला.

आरोपीने स्वतः पोलिसांत केली कबुली

घटनेनंतर आरोपी स्वतः पोलीस ठाण्यात गेला आणि त्याने गुन्ह्याची कबुली दिली. पोलीस घटनास्थळी पोहोचले तेव्हा घरातून आणि फ्रिजमधून शरीराचे अवयव जप्त करण्यात आले. मात्र, मृतदेहाचे शीर सापडले नाही. पोलिसांनी खुनाचा गुन्हा दाखल केला असून, शरीराच्या उर्वरित अवयवांचा शोध घेण्यासाठी विशेष पथक तयार करण्यात आले आहे. आरोपीला ताब्यात घेण्यात आले असून त्याची चौकशी सुरू आहे.

श्रद्धा वॉकर हत्याकांडाची आठवण

ही घटना २०२२ च्या कुप्रसिद्ध श्रद्धा वॉकर हत्याकांडाची आठवण करून देणारी आहे. त्या प्रकरणातही आरोपीने खुनानंतर मृतदेहाचे तुकडे करून ते फ्रिजमध्ये ठेवले होते आणि नंतर वेगवेगळ्या ठिकाणी त्याची विल्हेवाट लावली होती. सध्या या प्रकरणी पोलीस अधिक तपास करत आहेत.