वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

सेटवर सुरू झालेली कथा, अस्तित्वात उतरेल का? कलर्स मराठीवर येतेय नवी मालिका 'मोहिनी – प्रेमाची फिल्मी कहाणी'

अहंकारी सुपरस्टार आरके आणि स्ट्रीट-स्मार्ट मोहिनीच्या भेटीतून उलगडणार प्रेमाचा फिल्मी सफर; समीर परांजपे, अनघा ठाकूर, सोनाली पंडित नाईकच्या भूमिकांमुळे उत्सुकता

चंदेरी दुनियेचं आकर्षण, सोन्याच्या पडद्याची जादू… याला भुरळ पडत नाही असा कोणीच नाही. आजवर अनेक प्रेमकथा पाहिल्या आपण, पण ही प्रेमकथा आहे थोडी वेगळी कारण ही आहे अशा दोन व्यक्तींची कथा, ज्यांच्या आयुष्यात प्रेमापेक्षा स्वाभिमान आणि अहंकार आधी येतात. नवी मालिका 'मोहिनी – प्रेमाची फिल्मी कहाणी' आता लवकरच कलर्स मराठीवर प्रेक्षकांच्या भेटीला येत आहे.

कशाभोवती फिरते कथा?

या मालिकेची कथा मध्यमवर्गीय वातावरणात वाढलेल्या मोहिनी भोवती फिरते. फिल्मी सेटवर जन्मलेली ही साधी मुलगी आणि त्याच जगावर राज्य करणारा सुपरस्टार आरके (RK)... नियती, अहंकार आणि स्वाभिमान यांच्या संघर्षातून उभी राहणारी ही कथा प्रेक्षकांना एका भावनिक प्रवासावर घेऊन जाणार आहे.

जगण्याने मोहिनीला खूप काही शिकवलं आहे. ती एक लढवय्यी, संकटांना सामोरं जाणारी, बहुआयामी आणि अत्यंत स्ट्रीट-स्मार्ट स्त्री आहे. पडद्यामागच्या जगात वाढलेली ही मुलगी स्वतःच्या बळावर जगाला सामोरी जाते. मोहिनीचं एकच ध्येय आहे – स्वतःचं आयुष्य सन्मानाने उभं करणं आणि तिच्या आईचा हरवलेला सन्मान व गौरव पुन्हा मिळवणं. आता मोहिनी हे सगळं कसं मिळवणार? कुठली संकटं तिच्या वाट्याला येणार? हे हळूहळू उलगडणार आहे.

मालिकेतील प्रमुख भूमिका व कलाकार

| भूमिका | कलाकार |

| मोहिनी | अनघा ठाकूर |

| RK (सुपरस्टार) | समीर परांजपे |

| शालिनी (मोहिनीची आई) | सोनाली पंडित नाईक |

| महेंद्र (ॲक्शन डायरेक्टर) | शंतनू मोघे |

| ललिता | श्वेता मेहेंदळे |

| प्रताप | सुशील विश्वकर्मा |

शालिनी ही एका भीषण परिस्थितीतून स्वतःला, मोहिनीला आणि तिच्या होणाऱ्या मुलाला वाचवून आलेली स्त्री आहे. अभिनेत्री सोनाली पंडित नाईक १० वर्षांनी या मालिकेद्वारे मराठी मालिकांमध्ये पुनरागमन करत आहेत.

महेंद्र हा फिल्म इंडस्ट्रीतील ॲक्शन डायरेक्टर आहे ज्याने शालिनीला आणि तिच्या मुलींना जपलं. तो मोहिनी आणि कार्तिकीला स्वतःच्या नावाने वाढवतो.

 हा देशभरात चाहत्यांचा लाडका सुपरस्टार आहे. बाहेरून तो शक्तिशाली आणि आत्मविश्वासी दिसतो, तितक्याच खोल जखमा त्याच्या भूतकाळात दडलेल्या आहेत. तो अहंकारी असून मोहिनीशी त्याच्या पहिल्या भेटीतच संघर्ष निर्माण होतो.

निर्मात्यांचं म्हणणं

कलर्स मराठीचे सतीश राजवाडे म्हणाले, "कलर्स मराठी नेहमीच प्रेक्षकांसाठी वेगळ्या आणि भावनिकदृष्ट्या जोडणाऱ्या कथा घेऊन येत असते. 'मोहिनी – प्रेमाची फिल्मी कहाणी' ही एक वेगळ्या धाटणीची मालिका आहे. चंदेरी पडद्यावर वावरणाऱ्या लोकांची आणि त्यांच्या आयुष्याबद्दल उत्सुकता निर्माण करणारी ही मालिका प्रेक्षकांना नक्की आवडेल."

कलाकारांची प्रतिक्रिया

सोनाली पंडित नाईक (शालिनी) म्हणाल्या, "मोहिनी हा शो माझ्यासाठी खूप महत्वाचा आहे. मी प्रदीर्घ काळानंतर मराठी टेलिव्हिजनवर येते आहे. शालिनी पात्र सोनालीपेक्षा वेगळे आहे, आणि त्यामुळेच मज्जा येते करायला. ती सोशिक आहे, तिने पूर्व आयुष्यात खूप सोसलं आहे आणि त्यामुळे ती प्रचंड खंबीर झाली आहे."

शंतनू मोघे (महेंद्र) म्हणाले, "महेंद्र हा व्यवसायाने स्टंट, ॲक्शन डायरेक्टर आहे. त्यामुळे बाहेरून तो रफ अँड टफ वाटत असला, तरी तो कौटुंबिक मूल्यांना खूप महत्त्व देतो. या पात्रात अनेक वेगवेगळ्या छटा आहेत आणि ते साकारताना खूप छान अनुभव येतो आहे."

समीर परांजपे म्हणाला, "मोहिनी मालिकेसारखं कथानक मला वाटतं नाही मराठी टेलिव्हिजनवर झालं आहे. अशा कथानकाचा भाग होण्याची संधी मिळणे माझं भाग्य आहे. मी कधी न साकारलेलं पात्र करतो आहे. हा माझ्यासाठी खूप वेगळा अनुभव आहे... प्रेक्षकांना नक्कीच बघायला मज्जा येणार आहे."

काय आहे मालिकेची वैशिष्ट्ये?

या मालिकेत विश्वासघात, सूड, ओळख आणि जिद्द यांसारख्या प्रभावी भावनांचा वेध घेत प्रेक्षकांना बॉलिवूडच्या चकाकीमागील गडद वास्तवाचा एक भावनिक रोलरकोस्टर अनुभवायला मिळणार आहे. पडद्यामागच्या संघर्षातून स्वतःचं स्थान निर्माण करणारी मोहिनी आणि अहंकाराच्या भिंतीत अडकलेला सुपरस्टार RK यांच्या आयुष्यात नियती काय वळण आणणार हे पाहण्यासाठी उत्सुकता आहे.

लवकरच कलर्स मराठीवर 'मोहिनी – प्रेमाची फिल्मी कहाणी' सुरू होत आहे.