वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

कांदिवलीत धक्कादायक! लव्हमॅरेजनंतर सुरू होता सुखी संसार; पण नको ते भांडण बनलं शेवटचं कारण

सततच्या वादाला कंटाळून दोन मुलांच्या आईने घेतला टोकाचा निर्णय; पोलिसांनी भावाच्या तक्रारीवरून गुन्हा दाखल केला

मुंबईतील कांदिवली पूर्वेकडील समतानगर पोलीस स्टेशन हद्दीत एक अत्यंत हृदयद्रावक घटना घडली आहे. पती-पत्नीमध्ये रोज सुरू असलेल्या कडाक्याच्या भांडणाला कंटाळून एका २८ वर्षीय महिलेने आपल्या राहत्या घरी गळफास लावून आत्महत्या केली. या घटनेने परिसरात एकच खळबळ उडाली आहे.

नेमकं घडलं तरी काय?

पोलिसांनी दिलेल्या माहितीनुसार, मृत महिलेचे नाव पूजा शिंदे (बदललेले नाव) असून तिने काही वर्षांपूर्वी प्रेमविवाह केला होता. या दांपत्याला दोन लहान मुले आहेत. सुरुवातीचा काळ चांगला गेला, मात्र गेल्या काही महिन्यांपासून पती-पत्नीमध्ये किरकोळ कारणावरून वाद सुरू होते. हे वाद दिवसेंदिवस विकोपाला जाऊ लागले. शुक्रवारी संध्याकाळीही झालेल्या भांडणानंतर पूजाने टोकाचे पाऊल उचलत गळफास लावून घेतला.

पोलिसांची कारवाई

घटनेची माहिती मिळताच समतानगर पोलिसांनी घटनास्थळी धाव घेतली. मृत महिलेच्या भावाने दिलेल्या तक्रारीवरून पोलिसांनी आकस्मिक मृत्यूची नोंद करून पुढील तपास सुरू केला आहे. पोलीस या प्रकरणात पतीची चौकशी करत असून महिलेने आत्महत्या करण्यामागे नेमके कोणते कारण होते याचा तपास करत आहेत.

कर्तव्य बजावताना महिला पोलिसांना शिवीगाळ, राजकीय नेत्याच्या नातेवाईकाचा दावा; मरीन ड्राईव्हवर तणाव

VVIP मूव्हमेंटदरम्यान वाहतूक नियंत्रण करणाऱ्या पोलिस महिलेला 'तुझे कपडे फाटेपर्यंत मारेन' म्हणत धमकावलं; पोलीस ठाण्यातही दुर्लक्ष

मुंबईच्या मरीन ड्राईव्ह परिसरात कर्तव्य बजावत असलेल्या एका महिला वाहतूक पोलिसाशी एका उद्धट महिला कारचालकाने अश्लील शिवीगाळ केल्याची धक्कादायक घटना समोर आली आहे. हा प्रकार शुक्रवारी सायंकाळी साडेपाचच्या सुमारास NSCI जवळ घडला.

काय आहे प्रकरण?

VVIP हालचालीमुळे परिसरात वाहतूक नियंत्रणासाठी महिला पोलिसांची नियुक्ती करण्यात आली होती. यावेळी MH01 CD 8304 क्रमांकाची कार रस्त्याच्या मध्यभागी उभी असल्याने महिला पोलिसांनी ती बाजूला घेण्यास सांगितले. या सूचनेवरून संतापलेली महिला कारमधून उतरली आणि तिने पोलिसांना हाताशी धरले.

काय म्हणाले साक्षीदार?

प्रत्यक्षदर्शींनी दिलेल्या माहितीनुसार, त्या महिलेने पोलिसांना उद्देशून अपमानास्पद शब्द वापरत "तुझे कपडे फाटेपर्यंत मारेन", अशी धमकी दिली. तसेच "नशीबवान आहेस की मी तुला आत्ताच संपवलं नाही", असे म्हणत तिने पोलिसांना प्राणघातक धमकीही दिली. यावेळी तिने स्वतःला एका राजकीय नेत्याची नातेवाईक असल्याचे सांगून पोलिसांवर दबाव आणण्याचाही प्रयत्न केला.

पोलीस ठाण्यातही निराशा

या प्रकारानंतर हैराण झालेल्या महिला पोलिसाने मरीन ड्राईव्ह पोलीस स्टेशन गाठून तक्रार दाखल करण्याचा प्रयत्न केला. मात्र, तेथील एका अधिकाऱ्याने "ये सब रोज होता है यहाँ", असे म्हणत तिची तक्रार गांभीर्याने न घेतल्याचे समोर आले आहे. या घटनेमुळे कर्तव्य बजावणाऱ्या महिला पोलिसांच्या सुरक्षिततेचा प्रश्न पुन्हा एकदा उपस्थित झाला आहे. पोलिसांनी या प्रकरणी अद्याप कोणतीही कारवाई केलेली नाही. मात्र, या घटनेचा व्हिडिओ व्हायरल झाल्यानंतर वरिष्ठ अधिकारी चौकशीचे आदेश देण्याची शक्यता वर्तवली जात आहे.