वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

 

सातारा जिल्हा परिषद अध्यक्षपदावरून महायुतीत ठिणगी; 'भाजपचाच अध्यक्ष होणार', जयकुमार गोरेंचा आक्रमक पवित्रा

सातारा: जिल्हा परिषद निवडणुकांचे निकाल लागल्यानंतर आता सत्तेच्या समीकरणावरून महायुतीमधील अंतर्गत मतभेद उघड झाले आहेत. सातारा जिल्हा परिषदेच्या अध्यक्षपदावर भारतीय जनता पक्षाने आपला दावा ठामपणे मांडला असून, ग्रामविकास मंत्री जयकुमार गोरे यांच्या विधानाने राजकीय वातावरण चांगलेच तापले आहे.

'सर्वात मोठा पक्ष आमचाच'

सातारा जिल्ह्यात भारतीय जनता पक्ष हा सर्वात मोठा पक्ष म्हणून समोर आला आहे. या बळावर बोलताना जयकुमार गोरे म्हणाले की, "जिल्ह्यात भाजपची ताकद मोठी आहे, त्यामुळे अध्यक्षपद आमच्याच पक्षाला मिळावे, ही आमची ठाम भूमिका आहे. लोकशाहीत आकड्यांना महत्त्व असते आणि ते आमच्याकडे आहेत."

समन्वय न झाल्यास 'आरपार'ची लढाई?

महायुतीमधील मित्रपक्षांशी संवाद सुरू असल्याचे सांगतानाच त्यांनी स्पष्ट इशाराही दिला आहे. "जर समन्वयातून सन्मानजनक तोडगा निघाला नाही, तर अध्यक्षपदासाठी जे काही करावे लागेल ते आम्ही करू," अशा कडक शब्दांत त्यांनी भाजपची आक्रमक भूमिका मांडली. त्यांच्या या विधानामुळे सातारा जिल्हा परिषदेत सत्तास्थापनेसाठी पडद्यामागे मोठ्या हालचाली सुरू असल्याचे संकेत मिळत आहेत.

आता जयकुमार गोरेंच्या या आव्हानाला महायुतीमधील इतर घटक पक्ष कसा प्रतिसाद देतात आणि वरिष्ठ पातळीवर काय निर्णय होतो, याकडे सर्वांचे लक्ष लागले आहे.