वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

  बारामती विमानतळाला रात्रीच्या उड्डाणांची परवानगी; अजित पवारांच्या स्मृतीप्रित्यर्थ फडणविसांची अर्थसंकल्पात मोठी घोषणा

 लातूर, अमरावती विमानतळांनाही रात्रीच्या उड्डाणांची सुविधा; नवी मुंबई विमानतळावरून डिसेंबरपासून देशांतर्गत उड्डाणे सुरू होणार

 मुंबई : मुख्यमंत्री देवेंद्र फडणवीस (Devendra Fadnavis) यांनी आज (६ मार्च) विधानसभेत महाराष्ट्राचा अर्थसंकल्प (Maharashtra Budget 2026) सादर केला. दिवंगत उपमुख्यमंत्री अजित पवार (Ajit Pawar) यांच्या अपघाती निधनानंतर हा अर्थसंकल्प सादर करताना फडणवीस भावूक झाले. त्यांनी अजित पवारांना श्रद्धांजली वाहतानाच बारामती विमानतळासह राज्यातील विविध विमानतळांच्या विकासासाठी महत्त्वाच्या घोषणा केल्या.

अजित पवारांचे स्मारक आणि श्रद्धांजली

अर्थसंकल्प सादर करताना मुख्यमंत्री देवेंद्र फडणवीस म्हणाले, "माझं अंतःकरण जड झालं आहे. अजितदादांनी ११ वेळा अर्थसंकल्प मांडला. त्यांच्या करड्या स्वभावामुळे आर्थिक शिस्त राहिली. त्यांना श्रद्धांजली म्हणून त्यांचं भव्य स्मारक उभारलं जाईल. तसेच त्यांच्या नावे नागरी पुरस्कार सुरू केला जाईल. काम करणारा माणूस अशी अजितदादांची ओळख होती. त्यांच्या जाण्याने निर्माण झालेली पोकळी कधीच भरून निघू शकत नाही."

बारामती विमानतळासह विमान वाहतूक क्षेत्रातील मोठ्या घोषणा

अजित पवार यांच्या विमान अपघातानंतर बारामती विमानतळाच्या सुरक्षेबाबत अनेक प्रश्न उपस्थित झाले होते. चौकशी अहवालातही काही त्रुटी आढळून आल्या होत्या. या पार्श्वभूमीवर मुख्यमंत्री फडणवीस यांनी बारामतीसह राज्यातील इतर विमानतळांच्या विकासासाठी मोठी घोषणा केली आहे.

बारामती विमानतळ: लातूर, बारामती आणि अमरावती विमानतळांवर आता रात्रीच्या उड्डाणांसाठी सुविधा उपलब्ध करून देण्यात येणार आहेत.

नवी मुंबई विमानतळ: २५ डिसेंबर २०२५ पासून नवी मुंबई आंतरराष्ट्रीय विमानतळावरून देशांतर्गत उड्डाणांना सुरुवात होणार आहे.

पुरंदर विमानतळ: पुण्यासाठी प्रस्तावित पुरंदर विमानतळासाठी विशेष प्राधिकरण स्थापन करण्यात येणार असून भूसंपादनाचे काम अंतिम टप्प्यात आहे.

गडचिरोली विमानतळ: गडचिरोली येथे नवीन विमानतळ उभारण्यासाठी भूसंपादनाची प्रक्रिया सुरू करण्यात येईल.

इतर विमानतळांचा विस्तार: शिर्डी, नाशिक, संभाजीनगर (औरंगाबाद), अमरावती, अकोला, रत्नागिरी, यवतमाळ आणि कराड येथील विमानतळांच्या विस्तारीकरणाला मान्यता देण्यात आली आहे.

या निर्णयामुळे राज्यातील विमान वाहतूक क्षेत्राला मोठा चालना मिळणार असून, अजित पवार यांच्या बारामती मतदारसंघासह विदर्भ आणि मराठवाड्यातील कनेक्टिव्हिटी सुधारण्यास मदत होणार आहे.