वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

अंनिसच्या वतीने डॉ. हमीद दाभोळकर यांची मागणी; चंद्रग्रहणाच्या पार्श्वभूमीवर अवैज्ञानिक समजुतींवर उठविला आवाज

क्रांती न्यूज वृत्त:

सातारा/पुणे : भारतभर होळी-धुळवड सणाचा उत्साह साजरा केला जात असताना यंदाच्या सणाला चंद्रग्रहणाची पार्श्वभूमी लाभली आहे. बुधवारी (३ मार्च) वर्षातील पहिले चंद्रग्रहण असल्याने अनेक ठिकाणी पारंपरिक रुढी-परंपरा पाळल्या जात आहेत. मात्र, ग्रहण ही पूर्णपणे खगोलशास्त्रीय घटना असून त्याचा मानवी जीवनाशी कोणताही संबंध नसल्याचे स्पष्ट करत महाराष्ट्र अंधश्रद्धा निर्मूलन समितीने (अंनिस) अंधश्रद्धा पसरविणाऱ्यांवर कारवाईची मागणी केली आहे.

चंद्रग्रहणानिमित्त समाजमाध्यमांवर गर्भवती महिलांनी एकाच जागी बसावे, पाणी पिऊ नये, मलमूत्र विसर्जन करू नये अशा अवैज्ञानिक गोष्टींचा प्रसार केला जात आहे. या पार्श्वभूमीवर अंनिसचे डॉ. हमीद दाभोळकर यांनी निवेदन प्रसिद्ध केले आहे. "ग्रहण ही एक खगोलीय घटना आहे. यामुळे मानवी जीवनावर किंवा आरोग्यावर कोणताही परिणाम होत नाही. अशा अंधश्रद्धा पसरविणाऱ्या व्यक्ती वा संस्थांवर शासनाने कायदेशीर कारवाई करावी," अशी मागणी त्यांनी केली.

दरम्यान, चंद्रग्रहणाच्या पार्श्वभूमीवर पुण्यातील प्रसिद्ध दगडूशेठ हलवाई गणपती मंदिर दुपारी ३.२० ते सायंकाळी ६.४८ या कालावधीसाठी बंद ठेवण्यात आले होते. ग्रहण संपल्यानंतर विधीवत पूजा करून मंदिर भाविकांसाठी खुले करण्यात आले.

तसेच, मुंबईत झालेल्या एका क्रिकेट सामन्याच्या पार्श्वभूमीवर भारतीय संघ व्यवस्थापनाने चंद्रग्रहणाचा हवाला देत सरावाची वेळ बदलल्याची माहिती समोर आली आहे. भारतीय संघाने आपला दुपारचा सराव टाळून सायंकाळी उशिरा फ्लडलाईटखाली सराव करण्याचा निर्णय घेतला. मात्र, इंग्लंड संघाने पूर्वनियोजित कार्यक्रमाप्रमाणे दुपारी सराव केला.