म्हसवड : धुळदेवमध्ये भयानक अपघात, दोघे जागीच ठार; तीन जखमी

 वर्षानुवर्षांची परंपरा मोडीत काढण्याचा प्रयत्न; आळंदी देवस्थानचे विश्वस्त आणि पालखी विठोबा मंदिर विश्वस्तांमध्ये मतभेद

पुणे : संत ज्ञानेश्वर महाराजांच्या पालखीच्या पुण्यातील मुक्कामाचे ठिकाण बदलण्याचा प्रयत्न सुरू असल्याचे समोर आले आहे. आळंदीहून प्रस्थान केल्यानंतर ज्ञानेश्वर माऊलींची पालखी दोन दिवस पारंपरिकपणे पुण्यातील पालखी विठोबा मंदिरात मुक्कामाला थांबते. मात्र यंदा या ठिकाणी बदल करण्याची चाचपणी सुरू असल्याचे बोलले जात आहे.

मागील वर्षी पालखी मुक्कामी असताना आळंदी देवस्थानचे एक विश्वस्त आणि पालखी विठोबा मंदिराचे विश्वस्त यांच्यात झालेल्या वादामुळे हा बदल प्रस्तावित करण्यात येत असल्याचे सांगितले जाते. आळंदी देवस्थानच्या विश्वस्तांनी मुख्य कारण म्हणून गर्दीसाठी जागा अपुरी पडत असल्याचे सांगितले आहे.

 महापालिकेची १० कोटींची तरतूद

मात्र, याच पार्श्वभूमीवर पुणे महानगरपालिकेने मागील आठवड्यात सादर केलेल्या अर्थसंकल्पात पालखी विठोबा मंदिराच्या परिसरातील जागा अधिग्रहित करून भाविकांसाठी अधिक मोठी जागा उपलब्ध करून देण्यासाठी १० कोटी रुपयांची तरतूद केली आहे. तरीही पालखी विठोबा मंदिरातील विश्वस्तांनी मुक्कामाचे ठिकाण बदलण्यास विरोध दर्शवला आहे.

या प्रकरणी आळंदी देवस्थानचे विश्वस्त सोमवारी दुपारी तीन वाजता पुण्याच्या जिल्हाधिकाऱ्यांची भेट घेणार आहेत. चर्चेत एस. पी. कॉलेजच्या मैदानावर पालखीचा मुक्काम ठेवण्याची शक्यता वर्तवली जात आहे.

 यंदा पालखी प्रस्थान लवकर

यंदा आषाढी वारीसाठी संत ज्ञानेश्वर महाराजांच्या पालखी सोहळ्याचे प्रस्थान ८ जुलै रोजी दुपारी ३ वाजता होणार आहे. नेहमीपेक्षा एक तास लवकर प्रस्थान होण्याचा निर्णय पंढरपूर येथील संत ज्ञानेश्वर मंदिरात झालेल्या बैठकीत घेण्यात आला. पालखी सोहळा प्रमुख एडवोकेट राजेंद्र उमाप यांनी ही माहिती दिली.

बैठकीत गोल रिंगण, उभे रिंगण आणि इतर प्रमुख कार्यक्रमांच्या अडचणींवरही चर्चा झाली. पालखी सोहळ्याचे संपूर्ण नियोजन पूर्ण झाल्याचे उमाप यांनी सांगितले.

पालखी विठोबा मंदिरातील मुक्काम हा ज्ञानेश्वर माऊलींच्या पालखीचा अनेक वर्षांचा परंपरागत मुक्काम आहे. यात बदल झाल्यास भाविक आणि वारकऱ्यांमध्ये मोठी चर्चा होण्याची शक्यता आहे. जिल्हाधिकाऱ्यांसोबत होणाऱ्या बैठकीत याबाबत अंतिम निर्णय होण्याची अपेक्षा आहे.