म्हसवड : धुळदेवमध्ये भयानक अपघात, दोघे जागीच ठार; तीन जखमी

 ऑनलाइन प्रणालीतही परवान्याची नोंद नाही; २०१२ मध्ये दिलेला परवाना २०२४ मध्ये नूतनीकरण; तत्कालीन तहसीलदार-अधिकाऱ्यांवर कारवाईची शक्यता

 नाशिक : स्वयंघोषित कॅप्टन भोंदूबाबा अशोक खरात प्रकरणात नवा धक्कादायक खुलासा समोर आला आहे. खरातला जिल्हा प्रशासनाने १२ वर्षांपूर्वी दिलेल्या शस्त्र परवान्याची ग्रामीण पोलिसांत आजतागायत नोंदच झालेली नाही. 

केंद्रीय गृह मंत्रालयाच्या NDAL-ALIIS ऑनलाइन प्रणालीमध्येही या शस्त्र परवान्याची कोणतीही नोंद आढळली नाही. शस्त्र परवाना मिळवण्यासाठी कठोर प्रक्रिया आणि पोलिस व्हेरिफिकेशन बंधनकारक असताना, अशोक खरातला हा परवाना नेमक्या कोणत्या कागदपत्रांच्या आधारे मिळाला, याचे गूढ अधिक गडद झाले आहे.

 मुख्य मुद्दे :

१५ ऑक्टोबर २०१२ रोजी तत्कालीन जिल्हाधिकाऱ्यांच्या मंजुरीनंतर अशोक खरातला शस्त्र परवाना देण्यात आला होता.

 हा परवाना १ जानेवारी २०२४ रोजी नूतनीकरण करण्यात आला होता.

 जिल्हा प्रशासनाने परवाना दिल्यानंतर ग्रामीण पोलिसांना माहिती देणे बंधनकारक असते, मात्र ही प्रक्रिया पूर्णपणे डावलण्यात आली.

स्थानिक पोलीस स्टेशनलाही या परवान्याची माहिती नव्हती.

या प्रकरणात तत्कालीन तहसीलदार आणि संबंधित प्रशासकीय अधिकारी अडचणीत येण्याची शक्यता आहे. पोलीस अधीक्षक कार्यालयासह SIT चौकशी करण्याची शक्यता वर्तवली जात आहे.

 परवाना रद्द

अशोक खरातकडे असलेल्या पिस्तुलाचा शस्त्र परवाना आता रद्द करण्यात आला आहे.

 पोलीस कोठडीत वाढ

न्यायालयाने अशोक खरातच्या पोलीस कोठडीत १ एप्रिलपर्यंत वाढ केली आहे. महिलांवरील अत्याचार आणि आर्थिक फसवणुकीच्या या प्रकरणात तपासाची व्याप्ती वाढत चालली असून, नवनवीन पीडित महिला समोर येत आहेत.

 खरातची ‘कोल्ड रिडिंग’ आणि ‘हॉट रिडिंग’ची मोडस ऑपरेंडी

पोलिस तपासात अशोक खरातची नवी कार्यपद्धती समोर आली आहे. तो ग्राहकांची (पीडितांची) आधीच सविस्तर माहिती गोळा करत असे. नातेवाईक, मित्र, शत्रू, वैयक्तिक चढ-उतार याबाबत माहिती घेऊन तो कोल्ड रिडिंग आणि हॉट रिडिंग तंत्राचा वापर करत असे. 

हॉट रिडिंग : आधीच माहिती गोळा करून ठेवणे

कोल्ड रिडिंग : सामान्य प्रश्न विचारून समोरच्याला भ्रमित करणे

मानसशास्त्र आणि फेस रीडिंगचा प्रभावी वापर करून तो लोकांना आपल्या जाळ्यात ओढत असल्याचा पोलिसांचा अंदाज आहे.

या प्रकरणात तपास अधिकाधिक खोलात जात असून, अशोक खरातच्या गुन्हेगारी नेटवर्कचे आणखी धागेदोरे उघडकीस येण्याची शक्यता आहे. अधिक अपडेट्स येताच वृत्त देण्यात येईल.