वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

'खान्देशचा राजा' झाला बेघर! सचिन कुमावतच्या एलिमिनेशनने हळहळलेले स्पर्धक; प्रेक्षकही नाराज

मुंबई / क्रांती न्यूज प्रतिनिधी:

'बिग बॉस मराठी'च्या सहाव्या पर्वातील सहावा आठवडा संपुष्टात आला असून या आठवड्यात एका अशा स्पर्धकाला घराबाहेर जाण्याची वेळ आली आहे, ज्याला सर्वसाधारणपणे 'चांगला माणूस' म्हणून ओळखले जात होते. खान्देशचा किंग म्हणून प्रसिद्ध असलेला सचिन कुमावत याला बिग बॉसच्या घरातून बाहेरचा रस्ता दाखवण्यात आला आहे. त्याच्या बाहेर जाण्याने घरातील इतर सदस्य हमसून हमसून रडल्याचे समोर आले आहे.

सहाव्या आठवड्याचा धक्का:

या आठवड्यात एकूण नऊ स्पर्धक नॉमिनेशनच्या यादीत होते. रोशन, सागर, राकेश, दीपाली, अनुश्री, रुचिता, सचिन, प्रभू आणि प्राजक्ता यांच्यामध्ये नॉमिनेशनची रणधुमाळी पाहायला मिळाली. अखेर ही यादी कमी करताना रोशन, रुचिता आणि सचिन हे तिघे डेंजर झोनमध्ये आले. या तिघांमधून प्रेक्षकांच्या मतांच्या आधारे एकाला घर सोडावे लागणार होते आणि हा धक्का बसला सचिन कुमावतला.

गेम न समजल्यानेच एलिमिनेशन?

सचिन कुमावत हा मूळचा साध्या स्वभावाचा असून त्याची अहिराणी गाणी आणि खान्देशी किंग म्हणून प्रसिद्धी आहे. मात्र, बिग बॉसच्या घरात त्याला म्हणावा तसा खेळ करता आला नाही. स्पर्धकांशी जुळवून घेण्यात आणि स्वतःसाठी स्टँड घेण्यात तो कुठेतरी कमी पडला. यामुळेच त्याला घर सोडावे लागले असल्याची चर्चा आहे. तरीसुद्धा, घरातील प्रत्येक स्पर्धकाशी त्याचे खूप चांगले संबंध होते आणि त्यामुळेच त्याच्या जाण्याने सर्व सदस्य शोकाकुल झाले.

सचिननंतर आता कोणाची पाळी?

सचिनच्या एलिमिनेशननंतर आता घरात 12 ते 13 स्पर्धक शिल्लक राहिले आहेत. यामध्ये आता नव्या वाइल्ड कार्ड एंट्रीची चर्चा सुरू झाली आहे. सध्या राखी सावंतने वाइल्ड कार्ड एंट्री घेत घरातील सदस्यांचे धाबे दणाणले आहेत. आता आणखी एका वाइल्ड कार्ड एंट्रीची शक्यता वर्तवली जात असून त्यामुळे घरातील समीकरणे पूर्णपणे बदलून जाणार आहेत.

प्रेक्षकांमध्येही सचिनच्या एलिमिनेशनबद्दल नाराजीचे सूर आहेत. अनेक चाहत्यांनी सोशल मीडियावर आपली नाराजी व्यक्त केली आहे. आता पुढील आठवड्यात बिग बॉसच्या घरात कोणता नवा ट्विस्ट येतोय, हे पाहणे महत्त्वाचे ठरणार आहे.