म्‍हसवडमध्ये वेल्डिंग करताना कामगाराचा मृत्यू

  'साखर साठ्याची चुकीची आकडेवारी देऊन कारखानदारांनी सरकारची फसवणूक केली; इथेनॉल दर ७० रुपये, साखरेचा एमएसपी ५० रुपये किलो करा'; उसाचे पूर्ण पीक न येता गळीत हंगाम सुरू केल्यास १-१.५% साखर उतारा घटणार

क्रांती न्यूज (प्रतिनिधी) - सचिन मेनकुदळे

बेळगाव / कोल्हापूर - स्वाभिमानी शेतकरी संघटनेचे नेते व माजी खासदार राजू शेट्टी यांनी आगामी ऊस गळीत हंगामात दराचा प्रश्न तापणार असल्याचे संकेत देत, केंद्र आणि राज्य सरकारांना झुकवण्यासाठी दोन्ही राज्यांतील ऊस उत्पादक शेतकऱ्यांनी वज्रमूठ धरावी, असे आवाहन केले आहे . साखरेचा किमान आधारभूत दर (MSP) प्रति किलो ५० रुपये (५ हजार रुपये प्रति क्विंटल) करण्यासह इथेनॉलचा दर प्रतिलिटर ७० रुपये करण्याच्या प्रमुख मागण्यांसाठी दोन्ही राज्यांतील शेतकरी २९ सप्टेंबरपासून केंद्रीय अन्न व नागरी पुरवठा मंत्री प्रल्हाद जोशी** यांच्या हुबळी येथील निवासस्थानाबाहेर बेमुदत धरणे आंदोलन करणार आहेत .

मेळाव्यात बोलताना राजू शेट्टी यांनी केंद्र सरकार आणि साखर कारखानदारांवर तीव्र प्रहार केला. ते म्हणाले, "देशातील मूठभर साखर कारखानदार व व्यापाऱ्यांनी केंद्र सरकारला शिल्लक साखर साठ्याची चुकीची आकडेवारी देऊन फसवणूक केली आहे."

त्यांच्या मते, या चुकीच्या आकडेवारीमुळे चालू वर्षी देशात साखरेची तीव्र टंचाई निर्माण झाली आहे. "जेमतेम ऑक्टोबर अखेरपर्यंत पुरेल एवढाच साखर साठा शिल्लक आहे," असा दावा त्यांनी केला . कारखान्यांच्या गोदामांमध्ये व्यापाऱ्यांनी लपवलेला साठा असून, तो कोणत्याही अधिकृत रेकॉर्डवर नसल्याचाही आरोप त्यांनी केला 

या संकटामुळे केंद्र सरकार यंदा घाईघाईने १५ ऑक्टोबरपासूनच ऊसाचा गळीत हंगाम सुरू करण्याचा निर्णय घेत असल्याचे शेट्टी म्हणाले .

देशातील ५० टक्क्यांहून अधिक साखर दक्षिण महाराष्ट्र व उत्तर कर्नाटकात उत्पादित होते . राजू शेट्टी यांच्या मते, साखरेच्या टंचाईमुळे केंद्र सरकारने गळीत हंगाम १५ ऑक्टोबरपासून सुरू केल्यास उसाची पूर्ण पक्वता न झाल्याने पुढील हंगामात १ ते दीड टक्का साखर उतारा (रिकव्हरी) घटणार आहे. याचा थेट फटका शेतकऱ्यांच्या उत्पन्नाला बसेल .

केंद्र सरकारने जरी ऊसाचा हमी भाव (FRP) प्रतिटन १०० रुपयांनी वाढविला असला, तरी तोडणी-वाहतूक खर्च वाढल्याने या वाढीचा ऊस उत्पादक शेतकऱ्यांना कोणताही फायदा होणार नाही, असेही शेट्टी यांनी स्पष्ट केले 

कर्नाटक राज्य रयत संघाचे अध्यक्ष चन्नाप्पा पुजारी यांनीही या आंदोलनाला पाठिंबा दिला. ते म्हणाले, यंदा साखरेसह बगॅस, मोलॅसिस, इथेनॉल, को-जनरेशन व इतर उपपदार्थांना (By-products) बाजारात विक्रमी दर मिळाले आहेत. कारखान्यांची आर्थिक परिस्थिती अत्यंत सुधारलेली असल्याने, गत गळीत हंगामात तुटलेल्या उसाला प्रतिटन ३०० रुपये दुसरा हप्ता तात्काळ मिळाला पाहिजे .

हुबळी येथील धरणे आंदोलनापूर्वी केंद्र सरकारने महाराष्ट्र व कर्नाटक या दोन्ही राज्यांचे मुख्यमंत्री तसेच शेतकरी संघटनांची तातडीची संयुक्त बैठक बोलवावी, अशी मागणी राजू शेट्टी यांनी केली . या बैठकीत साखर उद्योग, शेतकरी व ग्राहक या तिन्हींच्या हिताचे निर्णय घेण्यात यावेत.

"जोपर्यंत ऊस दराचा सन्मानजनक तोडगा निघत नाही, तोपर्यंत दोन्ही राज्यातील एकही साखर कारखाना सुरू करू दिला जाणार नाही," असा स्पष्ट इशारा यावेळी देण्यात आला .

राजू शेट्टींची घोषणा: २९ सप्टेंबरपासून हुबळीत केंद्रीय मंत्री प्रल्हाद जोशी यांच्या घराबाहेर बेमुदत धरणे आंदोलन .

मागण्या: साखरेचा एमएसपी ५० रुपये/किलो, इथेनॉल दर ७० रुपये/लिटर .

आरोप: कारखानदारांनी साखर साठ्याची चुकीची आकडेवारी देऊन सरकारची फसवणूक केली .

चिंता: १५ ऑक्टोबरपासून हंगाम सुरू झाल्यास साखर उतारा १-१.५% घटण्याची शक्यता .

इशारा: तोडगा न झाल्यास कारखाने सुरू करू दिले जाणार नाहीत .