वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

कुठे गारांचा पाऊस, तर कुठे उन्हाचा तडाखा; विदर्भ-मराठवाड्यात गारपिटीसह पावसाचा 'यलो अलर्ट', तर कोकणात उन्हाचा चटका वाढणार

वादळी वाऱ्यासह विजांचा कडकडाट; शेतकऱ्यांना पिके सुरक्षित ठिकाणी हलविण्याचा इशारा

पुणे : महाराष्ट्रात सध्या हवामानाची दोन टोकाची रूपे पाहायला मिळत आहेत. राज्याच्या काही भागात उन्हाची तीव्रता वाढत असतानाच, दुसरीकडे विदर्भ आणि मराठवाड्यात मात्र वादळी वाऱ्यासह पावसाने हजेरी लावली आहे. हवामान विभागाने (IMD) आज विदर्भ आणि मराठवाड्यातील अनेक जिल्ह्यांना 'यलो अलर्ट' जारी केला असून, काही ठिकाणी गारपिटीचा इशाराही देण्यात आला आहे.

  विदर्भात पावसाचा जोर, गारपिटीची शक्यता

विदर्भातील जिल्ह्यांमध्ये आज दुपारी ४ नंतर पावसाची तीव्रता वाढण्याचा अंदाज आहे. विशेषतः नागपूर, गोंदिया आणि अमरावती या जिल्ह्यांमध्ये काही ठिकाणी वादळी वाऱ्यासह गारपीट होण्याची शक्यता वर्तवण्यात आली आहे. तसेच,

   बुलढाणा, अकोला, चंद्रपूर आणि भंडारा : येथे ४० ते ५० किमी प्रतितास वेगाने वारे वाहतील आणि विजांच्या कडकडाटासह पाऊस होईल.

   वर्धा, गडचिरोली, यवतमाळ आणि वाशिम : येथे तुरळक ठिकाणी विजांसह पावसाची शक्यता आहे.

मराठवाड्यातील सर्वच जिल्ह्यांमध्ये वादळी वाऱ्यासह पावसाचा इशारा देण्यात आला आहे. उत्तर महाराष्ट्रातील जळगाव जिल्ह्याला ताशी ५०-६० किमी वेगाने वाहणाऱ्या वाऱ्यांचा फटका बसू शकतो, तिथेही विजांसह पावसाचा अंदाज आहे.

पश्चिम महाराष्ट्र आणि कोकणची स्थिती

   सोलापूर : जिल्ह्यासाठी 'यलो अलर्ट' असून हलका ते मध्यम पाऊस अपेक्षित आहे.

   सांगली, सातारा, कोल्हापूर आणि अहिल्यानगर : या भागात काही ठिकाणी हलक्या सरी कोसळू शकतात.

   कोकण : मात्र, कोकण किनारपट्टीवर परिस्थिती वेगळी असून पुढील दोन दिवसांत तिथे उन्हाचे चटके पुन्हा वाढणार आहेत, ज्यामुळे नागरिकांना उकाड्याचा सामना करावा लागेल.

दुपारनंतर पावसाची शक्यता असल्याने काढणीला आलेली पिके सुरक्षित स्थळी हलवण्याचे आवाहन प्रशासनाकडून करण्यात आले आहे. वाऱ्याचा वेग जास्त असल्याने झाडांखाली किंवा पत्र्याच्या शेडखाली आश्रय घेणे टाळावे, अशा सूचनाही देण्यात आल्या आहेत.