शिंदेंच्या भाषणादरम्यान फडणवीसांची एन्ट्री, एका वाक्यात वाद संपवला; सातारा राड्याने विधिमंडळ गदगदले

'अजितदादा आपल्यात नसतानाचा हा तुझा पहिला वाढदिवस'; सुनिल तटकरे यांच्या भावनिक शुभेच्छांनी राजकीय वर्तुळात भावुकतेचे वातावरण.

'प्रिय पार्थ, अजितदादांकडून आलेला वारसा जपत सर्वसामान्य जनतेसाठी झिजावेस अन्...'; पार्थ पवारांच्या वाढदिवसानिमित्त सुनिल तटकरेंची भावनिक पोस्ट

मुंबई : राष्ट्रवादी काँग्रेसचे खासदार आणि अजित पवार यांचे सुपुत्र पार्थ पवार यांचा आज वाढदिवस आहे. यानिमित्त राज्यभरातून त्यांना शुभेच्छांचा वर्षाव होत आहे. अशातच राष्ट्रवादीचे प्रदेशाध्यक्ष सुनिल तटकरे यांनी एक भावनिक पोस्ट करत पार्थ पवार यांना वाढदिवसाच्या शुभेच्छा दिल्या आहेत. या पोस्टमध्ये त्यांनी अजित पवार यांच्या स्मृतींनाही उजाळा दिला आहे.

सुनिल तटकरे काय म्हणाले?

सुनिल तटकरे यांनी सोशल मीडियावर लिहिलेल्या पोस्टमध्ये म्हटले आहे:

"प्रिय पार्थ,

यंदा एका वेगळ्याच परिस्थितीत आपण सारेच जण सापडलो आहोत. अजितदादा आपल्यात नसतानाचा हा तुझा पहिला वाढदिवस. अशा परिस्थितीत शुभेच्छा देताना मनात असंख्य आठवणी दाटून येतात.

अजितदादांचा कार्यकर्तृत्वाचा डोंगर फार मोठा होता. तो डोंगर पार करून तू त्या पलीकडे जात कर्तृत्वाची उंची गाठाविस, अजितदादांकडून आलेला वारसा जपत सर्वसामान्य जनतेसाठी झिजावेस आणि तुझ्या कामातून तुझी वेगळी ओळख निर्माण करावीस यासाठी अनेक शुभेच्छा आणि आशीर्वाद!"

भावनिक शुभेच्छांनी वातावरण ओलावले

सुनिल तटकरे यांच्या या भावनिक पोस्टने राजकीय वर्तुळात भावुकतेचे वातावरण निर्माण झाले आहे. अजित पवार यांच्याशी असलेले जिव्हाळ्याचे नाते आणि पार्थ पवार यांच्याबद्दलची अपेक्षा या पोस्टमधून स्पष्टपणे दिसून आली आहे. 'अजितदादा आपल्यात नसतानाचा हा तुझा पहिला वाढदिवस' या एका ओळीने अनेकांच्या डोळ्यात पाणी आणले आहे.

वाढदिवसापूर्वीच पार्थ यांचे आवाहन

दरम्यान, पार्थ पवार यांनी आपल्या वाढदिवसाच्या एक दिवसाआधी सोशल मीडियावर एक पोस्ट करत सर्वांना नम्र आवाहन केले होते. ते म्हणाले:

"लोकनेते आदरणीय अजितदादा पवार यांच्या स्मृतींना विनम्र अभिवादन… आदरणीय दादांनी आयुष्यभर शिस्त, समर्पण आणि विकासाचा ध्यास घेत महाराष्ट्राची सेवा केली. त्यांच्या कार्यातून आपणाला निष्ठा, कर्तव्यभावना आणि जनतेप्रती असलेली बांधिलकी यांचे मोल शिकायला मिळाले.

आज त्यांच्या स्मृती जपत असताना, त्यांच्याप्रती असलेला आदर अधिक सुसंगत आणि एकसंधपणे व्यक्त व्हावा, यासाठी सर्वांना नम्र आवाहन... बॅनर्स, जाहिराती, घरात किंवा कार्यालयामध्ये लावण्यासाठी आदरणीय दादांचा एकच अधिकृत फोटो वापरावा.

हीच एकसंधता, हीच शिस्त आणि हीच भावना दादांना खरी आदरांजली ठरेल... चला, त्यांच्या विचारांना कृतीत उतरवूया, त्यांच्या कार्याचा वारसा जपूया आणि महाराष्ट्राच्या प्रगतीसाठी एकदिलाने पुढे जाऊया…"

पार्थ पवारांचा विशेष वाढदिवस

अजित पवार यांचे निधन झाल्यानंतरचा हा पार्थ पवार यांचा पहिला वाढदिवस असल्याने या दिवसाला विशेष महत्त्व आहे. वडिलांची स्मृती आणि वारसा जपत पार्थ यांनी साधेपणाने आणि शिस्तबद्ध पद्धतीने हा दिवस साजरा करण्याचे आवाहन केले आहे. सुनिल तटकरे यांच्या शुभेच्छांमधूनही हीच भावना ठळकपणे दिसून आली आहे. अजित पवार यांच्यापासून मिळालेला वारसा पुढे नेण्याची जबाबदारी आता पार्थ पवार यांच्यावर असून, राजकीय वर्तुळ त्यांच्या पुढील वाटचालीकडे अपेक्षेने पाहत आहे.