वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

  २३ वर्षांच्या कारकिर्दीत नाणेफेक-बक्षीस वितरणासाठी संधी नाकारल्याचा आरोप; 'त्वचेचा रंग हाच मुद्दा आहे का' या प्रश्नाला 'वर्णद्वेष' म्हणत दिले उत्तर.

समालोचक शिवरामकृष्णनांच्या बीसीसीआय पॅनलमधून तडकाफडकी राजीनाम्याने खळबळ, वर्णभेदाचा गंभीर आरोप; शेन वॉर्नच्या फिरकीचा सामना करण्यासाठी सचिनला दिलं होतं ट्रेनिंग

नवी दिल्ली : माजी भारतीय क्रिकेटपटू आणि दिग्गज समालोचक लक्ष्मण शिवरामकृष्णन यांनी बीसीसीआयच्या समालोचन पॅनेलमधून अचानक राजीनामा देत मोठी खळबळ उडवली आहे. त्यांनी वर्णभेदाचा गंभीर आरोप करतानाच आपल्या २३ वर्षांच्या कारकिर्दीत नाणेफेक आणि बक्षीस वितरणासारख्या महत्त्वाच्या प्रसंगी संधी नाकारल्याचे म्हटले आहे. शुक्रवारी सोशल मीडिया प्लॅटफॉर्म 'एक्स'वर केलेल्या पोस्टमध्ये त्यांनी ही माहिती दिली.

राजीनाम्यामागे नेमकं काय?

शिवरामकृष्णन यांनी 'एक्स'वर लिहिले की, "मी बीसीसीआयसाठी समालोचन करण्यापासून निवृत्त होत आहे." नवीन समालोचकांना सतत संधी मिळत राहिली, तर आपल्याकडे बराच काळ दुर्लक्ष केले गेले, असे त्यांनी म्हटले आहे. त्यांनी सांगितले की, निवृत्तीमागे टीव्ही निर्मितीशी संबंधित एक मोठी कहाणी आहे, जी लवकरच उघड होईल.

नाणेफेक आणि बक्षीस वितरणासाठी का पाठवलं नाही?

शिवरामकृष्णन यांनी आपल्या पोस्टमध्ये स्पष्ट केले की, "गेल्या २३ वर्षांपासून मला नाणेफेक आणि बक्षीस वितरण समारंभासाठी पाठवले गेले नाही, उलट खेळपट्टीचा अहवाल, नाणेफेक आणि बक्षीस वितरण समारंभासाठी नवीन लोकांना पाठवले जात आहे. रवी शास्त्री प्रशिक्षक असतानासुद्धा मला पाठवले गेले नव्हते, तर याचा अर्थ काय असू शकतो?"

ते पुढे म्हणाले, "बीसीसीआयच्या हक्क कंपनीची काय अवस्था असेल याचा कोणीही अंदाज लावू शकतो. माझी निवृत्ती ही काही मोठी गोष्ट नाही, पण टीव्ही निर्मितीबद्दल एक नवीनच कहाणी समोर येत आहे. संपूर्ण चित्र लवकरच तुमच्यासमोर स्पष्ट होईल."

वर्णद्वेष' असा गंभीर आरोप

जेव्हा एका वापरकर्त्याने विचारले की, त्यांच्या त्वचेचा रंग हा काही मुद्दा आहे का, तेव्हा शिवरामकृष्णन यांनी सरळ उत्तर दिले, "तुम्ही बरोबर आहात. वर्णद्वेष." या एका उत्तराने संपूर्ण क्रिकेट वर्तुळात खळबळ उडाली आहे. दोन दशकांहून अधिक काळ समालोचन कक्षातील आपल्या स्पष्टपणासाठी ओळखले जाणारे शिवरामकृष्णन यांनी बीसीसीआयवर वर्णभेदाचा थेट आरोप केला आहे.

शेन वॉर्नच्या फिरकीचा सामना करण्यासाठी सचिनला दिलं होतं ट्रेनिंग

शिवरामकृष्णन यांनी १९८३ ते १९८६ या काळात भारतासाठी नऊ कसोटी आणि १६ एकदिवसीय सामने खेळले. १९८४ मध्ये इंग्लंडविरुद्धच्या सामन्यात १२ बळी घेऊन ते चर्चेत आले. १९८५ च्या विश्वचषक स्पर्धेत अंतिम सामन्यात पाकिस्तानविरुद्ध त्यांच्या गोलंदाजीने संघाच्या विजयात महत्त्वाची भूमिका बजावली.

१९९७-९८ मध्ये जेव्हा ऑस्ट्रेलियन संघाने भारताचा दौरा केला, तेव्हा सचिन तेंडुलकरने शेन वॉर्नच्या आव्हानाला तोंड देण्यासाठी शिवरामकृष्णन यांची मदत घेतली होती. शिवरामकृष्णन यांची क्रिकेट कारकीर्द फार काळ टिकली नसली तरी, त्यानंतर त्यांनी समालोचक म्हणून स्वतःची वेगळी ओळख निर्माण केली.

कोण आहेत लक्ष्मण शिवरामकृष्णन?

१९८० च्या दशकाच्या सुरुवातीला, वयाच्या १७ व्या वर्षी, त्यांनी आपल्या दमदार लेग-स्पिन, गुगली आणि टॉप-स्पिन गोलंदाजीने क्रिकेट वर्तुळात खळबळ उडवून दिली होती. ते २००० सालापासून समालोचन करत होते. त्यांनी आयसीसी क्रिकेट समितीवर खेळाडू प्रतिनिधी म्हणूनही काम केले आहे. आता त्यांच्या या राजीनाम्यामुळे आणि वर्णभेदाच्या आरोपामुळे बीसीसीआयवर नवा वाद उफाळून आला आहे. बीसीसीआय या प्रकरणी काय भूमिका घेते, याकडे सर्वांचे लक्ष लागले आहे.