ऐतिहासिक क्षण: स्वातंत्र्यानंतर पहिल्यांदाच आटपाडीच्या गोरडवस्तीला मिळाले नळ पाणी!

 

​सातारा पोलिसांचा दणका! गोट्या ढोणे टोळीतील १० गुंड ५ महिन्यांसाठी सातारा जिल्ह्यातून हद्दपार

​क्रांती न्यूज (प्रतिनिधी)  - अवंतिका

सातारा: प्रतिनिधी

सातारा शहर आणि शाहूपुरी परिसरातील नागरिकांमध्ये दहशत निर्माण करणाऱ्या आणि सातत्याने गंभीर गुन्हे करणाऱ्या 'देवेंद्र उर्फ गोट्या ढोणे' टोळीवर सातारा पोलिसांनी कडक कारवाई केली आहे. टोळी प्रमुखासह एकूण १० जणांना सातारा जिल्हा हद्दीतून पुढील ५ महिने कालावधीसाठी हद्दपार (तडीपार) करण्यात आले आहे. पोलीस अधीक्षक समीर शेख यांनी हे आदेश पारित केले आहेत.

​हद्दपार करण्यात आलेले आरोपी:

​१) देवेंद्र उर्फ गोट्या दिगंबर ढोणे (टोळी प्रमुख, वय ३१, रा. मंगळवार पेठ, सातारा)

२) प्रतीक सुरेश कोळी (वय २५, रा. ढोणे कॉलनी, सातारा)

३) पराग गणेश निवळे (वय २३, रा. मंगळवार पेठ, सातारा)

४) गणेश उर्फ गोट्या दत्तात्रय कणसे (वय २५, रा. अंगापूर, सातारा)

५) संकेत मधुकर आठवले (वय २३, रा. गोडोली, सातारा)

६) आदित्य दीपक पोळ (वय २५, रा. सैदापूर, सातारा)

७) यश राजेंद्र येवले (वय १९, रा. मंगळवार पेठ, सातारा)

८) चैतन्य ज्ञानेश्वर उईके (वय २०, रा. रामाचा गोट, सातारा)

९) यश संजय बिडकर (वय २५, रा. मंगळवार पेठ, सातारा)

१०) प्रकाश उर्फ दादा आनंदराव खरात (वय २५, रा. रामाचा गोट, सातारा)

​गुन्हेगारी पार्श्वभूमी

​या टोळीवर खुनाचा प्रयत्न, दरोडा, जबरी चोरी, बेकायदेशीर जमाव जमवून दहशत निर्माण करणे आणि जिवे मारण्याची धमकी देणे यांसारखे अनेक गंभीर गुन्हे दाखल आहेत. वारंवार प्रतिबंधक कारवाई करूनही या टोळीच्या गुन्हेगारी कारवाया थांबत नव्हत्या. उलट, या टोळीचा सातारा तालुका आणि शहरात उपद्रव वाढला होता. त्यामुळे सर्वसामान्य जनतेतून या गुंडांवर कठोर कारवाई करण्याची मागणी होत होती.

​प्रशासकीय कारवाईचा पाढा

​शाहूपुरी पोलीस ठाण्याचे तत्कालीन प्रभारी अधिकारी पोलीस निरीक्षक एस. जी. म्हेत्रे यांनी या टोळीविरुद्ध महाराष्ट्र पोलीस कायदा कलम ५५ अन्वये हद्दपारीचा प्रस्ताव पोलीस अधीक्षकांकडे सादर केला होता. उपविभागीय पोलीस अधिकारी राजीव नवले यांनी या प्रस्तावाची चौकशी केली. अखेर, पोलीस अधीक्षक समीर शेख यांनी पुराव्यांची पडताळणी करून या १० जणांना जिल्ह्याबाहेर काढण्याचे आदेश दिले.

​सराईत गुन्हेगारांना इशारा

​सातारा जिल्ह्यात शांतता आणि सुव्यवस्था राखण्यासाठी पोलीस दल सक्रिय झाले आहे. आगामी काळात सराईत गुन्हेगारांविरुद्ध तडीपारी, मोक्का (MCOCA) आणि एमपीडीए (MPDA) सारख्या कडक कारवाया सुरूच राहतील, असा स्पष्ट इशारा पोलीस प्रशासनाने दिला आहे.

​यांनी बजावली भूमिका:

सदर कारवाईत अपर पोलीस अधीक्षक डॉ. वैशाली कडुकर यांच्या मार्गदर्शनाखाली एलसीबीचे पोलीस निरीक्षक विश्वजीत घोडके, प्रमोद सावंत, अमित सपकाळ, राजु कांबळे, शिवाजी भिसे, अनुराधा सनस तसेच शाहूपुरी पोलीस ठाण्याचे सुनील रोकडे, केतन शिंदे व शुभम चव्हाण यांनी महत्त्वाची भूमिका बजावली.