वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

मुंबई महापालिकेत तडीपार व्यक्तीचा फोटो? भाजपचा आक्षेप; एमआयएम अध्यक्षा खैरुन्निसा हुसेन यांच्या कार्यालयातील छायाचित्र काढले, वाद पेटण्याची शक्यता

पती अकबर हुसेन यांचे छायाचित्र ओवैसींच्या फोटोशेजारी लावल्याने भाजपची तीव्र प्रतिक्रिया; २३ हून अधिक गुन्हे, ‘राजू बाटला’ नावानेही ओळख; एमआयएम नेतृत्वाने छायाचित्र हटवण्याचे दिले आदेश

मुंबई: मुंबई महापालिकेच्या राजकारणात नव्याने बळकट होत असलेल्या एमआयएम (AIMIM) पक्षाला पहिल्याच टप्प्यात वादाचा सामना करावा लागला आहे. एम पूर्व प्रभाग समितीच्या अध्यक्षपदी निवडून आलेल्या खैरुन्निसा अख्तर हुसेन यांच्या कार्यालयातील एका छायाचित्रामुळे राजकीय वातावरण तापले आहे. पती अकबर हुसेन हे तडीपार असल्याची माहिती समोर आल्यानंतर भाजपने तीव्र आक्षेप घेतला.

कार्यालयात कोणते छायाचित्र होते?

खैरुन्निसा यांनी आपल्या कार्यालयाच्या भिंतीवर पक्षाध्यक्ष असदुद्दीन ओवैसी यांच्या छायाचित्रासोबतच पती अकबर हुसेन यांचेही छायाचित्र लावले होते. हे छायाचित्र ओवैसी यांच्या फोटोच्या शेजारी लावण्यात आले होते. मात्र, अकबर हुसेन यांची गुन्हेगारी पार्श्वभूमी असून ते तडीपार असल्याचे समोर आल्यानंतर भाजपने यावर प्रश्नचिन्ह उपस्थित केले.

भाजपचा काय आक्षेप?

भाजपने “तडीपार व्यक्तीचे छायाचित्र शासकीय कार्यालयात कसे?” असा सवाल उपस्थित करत या प्रकरणाला राजकीय रंग दिला. भाजपच्या मते, अकबर हुसेन यांची गुन्हेगारी पार्श्वभूमी आहे. त्यांना हद्दपार करण्यात आले असल्याचा दावा भाजपने केला. कायद्याने प्रतिबंधित असलेल्या व्यक्तीचा फोटो सरकारी कार्यालयात प्रदर्शित करणे योग्य नसल्याचे भाजपने स्पष्ट केले.

अकबर हुसेन यांची गुन्हेगारी पार्श्वभूमी

नगरसेविका खैरुन्निसा यांचे पती अकबर हुसेन हे एक कुख्यात सराईत गुन्हेगार आहेत. पोलीस दप्तरी ते ‘राजू बाटला’ या नावानेही ओळखले जातात. त्यांच्यावर खून, खुनाचा प्रयत्न, खंडणी आणि तस्करीसह २३ हून अधिक गुन्हे दाखल आहेत. या गुन्हेगारी पार्श्वभूमीमुळेच हा वाद अधिक चिघळला.

एमआयएम नेतृत्वाने हस्तक्षेप केला

हा मुद्दा राजकीय रंग घेत असताना एमआयएमच्या गटनेतृत्वाने हस्तक्षेप केला. पक्षाच्या गटनेते विजय उबाळे यांनी खैरुन्निसा यांना संबंधित छायाचित्र हटवण्याचे निर्देश दिले. त्यानुसार कार्यालयातून ते छायाचित्र काढून टाकण्यात आले आहे.

खैरुन्निसा यांची प्रतिक्रिया काय?

एमआयएमच्या नेत्यांचे म्हणणे आहे की, अध्यक्षा खैरुन्निसा यांना या बाबत कोणतीही माहिती नव्हती. ही बाब त्यांच्या निदर्शनास येताच त्यांनी छायाचित्र काढण्याचे आदेश दिले. खैरुन्निसा यांच्या मते या मुद्द्याला विनाकारण अवाजवी महत्त्व दिले जात आहे.

पार्श्वभूमी काय?

यंदाच्या निवडणुकीत एमआयएमचे आठ नगरसेवक निवडून येत पक्षाने देवनार-गोवंडी परिसरातील एम पूर्व प्रभाग समितीवर सत्ता मिळवली आहे. मात्र सत्तेच्या पहिल्याच टप्प्यात निर्माण झालेल्या या वादामुळे पक्षाची कोंडी झाल्याची चर्चा राजकीय वर्तुळात रंगली आहे.