वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

मुंबईच्या राष्ट्रीय उद्यानातील ‘बीट्टू’ बिबट्याचा मृत्यू; प्रताप सरनाईकांशी होतं खास नातं, लेकाची भावुक पोस्ट

दीर्घ आजारानंतर ६ वर्षीय नर बिबट्याने घेतला अखेरचा श्वास; प्रताप सरनाईक यांनी दत्तक घेतल्याने कुटुंबीयांची मनापासून जोड; पूर्वेश सरनाईक म्हणाले, ‘तो फक्त प्राणी नव्हता, तर कुटुंबाचा भाग’

मुंबई: मुंबईच्या बोरीवली येथील संजय गांधी राष्ट्रीय उद्यानातील ‘बीट्टू’ नावाच्या ६ वर्षांच्या नर बिबट्याचा २१ मार्च २०२६ रोजी दीर्घ आजारामुळे मृत्यू झाला. गेल्या काही महिन्यांपासून आजारी असलेल्या बीट्टूवर पशुवैद्यकीय उपचार सुरू होते, मात्र अखेर प्रकृती खालावल्याने त्याने अखेरचा श्वास घेतला. बीट्टू हा २०१९ मध्ये ठाणे वन विभागातील येऊर परिसरातून बचाव करून उद्यानात आणण्यात आला होता.

कशामुळे झाला मृत्यू?

बीट्टूच्या तपासणीत त्याला पॉलीसिस्टिक किडनी डिसीज (मूत्रपिंडातील सिस्ट्सचा विकार) असल्याचे समोर आले होते. सोनोग्राफी तपासणीत हा आजार निष्पन्न झाला होता. त्याच्यावर उपचार सुरू असतानाही प्रकृतीत सातत्याने खालाव होत गेला. अखेर अंतर्गत गुंतागुंत वाढल्याने त्याचा मृत्यू झाला. शवविच्छेदनात मूत्रपिंडात सिस्ट्स आढळून आल्या असून प्राथमिक तपासणीत मूत्रपिंड विकारामुळे बहुअवयव निकामी होण्याची शक्यता व्यक्त करण्यात आली आहे. पुढील तपासणीसाठी जैविक नमुने मुंबई पशुवैद्यकीय महाविद्यालय, परळ येथे पाठवण्यात आले आहेत.

प्रताप सरनाईकांशी होते खास नातं

राज्याचे मंत्री तथा शिवसेना नेते प्रताप सरनाईक यांनी बीट्टू या बिबट्याला दत्तक घेतले होते. त्यामुळे बीट्टू आणि सरनाईक कुटुंबीयांमध्ये मनापासूनची जोड होती. बीट्टूच्या निधनानंतर प्रताप सरनाईक यांनीही आठवणी जागवत शोक व्यक्त केला आहे.

पूर्वेश सरनाईक यांची भावुक पोस्ट

प्रताप सरनाईक यांचे पुत्र पूर्वेश सरनाईक यांनी बीट्टूच्या निधनानंतर एक भावुक ट्विट केले आहे. ते म्हणाले, “आज आपल्या सर्वांचा लाडका, आपला दत्तक घेतलेला बाळ… ‘Bittu Boss’ आपल्याला सोडून गेला. तो फक्त एक प्राणी नव्हता, तर आपल्या कुटुंबाचा एक भाग होता.”

पुढे ते म्हणाले, “बिट्टूच्या आठवणी, त्याची निरागसता आणि आपुलकी सदैव आपल्या मनात जिवंत राहतील. Bittu Boss, तुझ्या आत्म्यास शांती लाभो.” या भावुक पोस्टने अनेक प्राणीप्रेमींना भुरळ घातली आहे.