वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

  मालदीवच्या फेलिधू भागात रात्री उशिरा झाली दुर्घटना; रॅली ड्रायव्हर हरिसिंगसह दोघे बेपत्ता.

 ग्रुपचे चेअरमन गौतम सिंघानियांची स्पीडबोट मालदीवमध्ये उलटली, तातडीने मुंबईत आणलं, उपचार सुरू; रशियन महिलेसह चार भारतीय वाहून गेले, नेमकं काय घडलं?

नवी दिल्ली : रेमंड ग्रुपचे चेअरमन आणि एमडी गौतम सिंघानिया यांचा मालदीवमध्ये स्पीडबोट अपघात झाला. काल (शुक्रवारी) पहाटे ही स्पीडबोट उलटली असून, सिंघानिया यांना किरकोळ दुखापती झाल्या आहेत. अपघातानंतर त्यांना तातडीने विमानाने मुंबईत आणण्यात आले असून, उपचार सुरू आहेत. या अपघातात रॅली ड्रायव्हर हरिसिंगसह दोन भारतीय बेपत्ता असून, एक रशियन महिला आणि चार भारतीय पुरुष समुद्रात वाहून गेल्याची माहिती समोर आली आहे.

कसा झाला अपघात?

मालदीवमधून मिळालेल्या माहितीनुसार, ही दुर्घटना मालदीवच्या फेलिधू भागात गुरुवारी रात्री ११ च्या सुमारास झाली. पर्यटकांना घेऊन जाणारी स्पीडबोट शुक्रवारी पहाटे ‘व्ही फेलिधू’ जवळ उलटली. या स्पीडबोटवर एकूण सात जण होते – यूके आणि रशियातील दोन महिला तसेच भारतातील पाच पुरुष. अपघातानंतर बोटीतील पाच जण समुद्रात वाहून गेले. यात एक रशियन महिला आणि चार भारतीय पुरुषांचा समावेश होता. सिंघानिया यांच्यासह इतर काही जणांना सुखरूप बाहेर काढण्यात आले.

बेपत्ता आणि जखमींबाबत माहिती

या अपघातात रॅली ड्रायव्हर हरिसिंगसह दोन भारतीय पुरुष अद्याप बेपत्ता असून त्यांचा शोध सुरू आहे. बोटीतील एका प्रवाशाचा हात तुटला असून त्याची प्रकृती गंभीर आहे. गौतम सिंघानिया यांना किरकोळ दुखापती झाल्या आहेत. मालदीव नॅशनल डिफेन्स फोर्सच्या कोस्ट गार्डनुसार, समुद्रातील उंच लाटांमुळे बेपत्ता प्रवाशांचा शोध घेणे कठीण होत आहे. शोधमोहीम सुरू असून, स्थानिक प्रशासनाकडून अधिक मदतकार्य केले जात आहे.

गौतम सिंघानिया यांची प्रकृती कशी?

सिंघानिया यांच्या प्रवक्त्यांनी दिलेल्या माहितीनुसार, “एका दुर्दैवी अपघातात गौतम सिंघानिया यांना किरकोळ दुखापत झाली आहे. त्यांना तातडीने मुंबईत आणण्यात आले असून, ब्रीच कँडी रुग्णालयात योग्य देखरेखीखाली उपचार सुरू आहेत.” मिळालेल्या माहितीनुसार, आता त्यांच्या प्रकृतीचा धोका टळला आहे.

अॅडव्हेंचर स्पोर्ट्सचा छंद आणि व्यावसायिक पार्श्वभूमी

गौतम सिंघानिया आणि हरिसिंग हे दोघे मित्र असून दोघांनाही अॅडव्हेंचर स्पोर्ट्सचा छंद आहे. रेमंड समूहाचा व्यवसाय वस्त्रोद्योग, रिअल इस्टेट, इंजिनिअरिंग आणि कन्झ्युमर केअर यांसारख्या क्षेत्रांमध्ये विस्तारलेला आहे. गौतम सिंघानिया यांची एकूण संपत्ती ११,००० कोटी रुपयांहून अधिक आहे. या अपघातामुळे उद्योग वर्तुळात खळबळ उडाली असून, बेपत्ता असलेल्यांच्या शोधकार्याकडे सर्वांचे लक्ष लागले आहे.