वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

 स्नूकर खेळताना झालेल्या वादातून खून; तीन अल्पवयीन मुलांनी मित्राचाच भर चौकात काटा काढल्याने पुणे हादरले!

किरकोळ कारणातून घडलेली निर्घृण घटना, आरोपी ताब्यात

पुणे: स्नूकर खेळताना फक्त रागाने पाहिले म्हणून तीन अल्पवयीन मुलांनी आपल्याच ओळखीच्या तरुणाचा भर चौकात धारदार शस्त्राने खून केल्याची खळबळजनक घटना पुण्यात घडली आहे. सिंहगड रोड परिसरातील या घटनेने नागरिकांमध्ये भीतीचे वातावरण पसरले आहे.

करण काशीद असे मृत तरुणाचे नाव असून तो स्थानिक रहिवासी होता. सोमवारी संध्याकाळी भरधाव वेळेत तिघांनी अचानक करणवर हल्ला चढवत त्याच्यावर सपासप वार केले. गंभीर जखमी अवस्थेत त्याला रुग्णालयात नेले असता उपचारादरम्यान त्याचा मृत्यू झाला.

स्नूकरमधून निर्माण झाली खुन्नस

पोलिसांनी दिलेल्या माहितीनुसार, करणची आणि आरोपी अल्पवयीन मुलांची ओळख होती. जानेवारी महिन्यात एकत्र स्नूकर खेळत असताना करणने आरोपींकडे रागाने पाहिले होते. या क्षुल्लक कारणाचा राग मनात धरून आरोपींनी करणचा खून करण्याचा कट रचल्याचे प्राथमिक तपासात निष्पन्न झाले आहे.

नियोजनबद्ध हल्ला, पोलिसांची तातडीची कारवाई

ही घटना पूर्वनियोजित असल्याचा संशय पोलिसांनी व्यक्त केला आहे. सोमवारी संध्याकाळी संधी साधत आरोपींनी करणला गाठून हल्ला केला. या घटनेमुळे परिसरात काही काळ तणावाचे वातावरण निर्माण झाले होते.

घटनेची माहिती मिळताच सिंहगड रोड पोलिसांनी तात्काळ कारवाई करत काही तासांतच तिन्ही आरोपींना ताब्यात घेतले. आरोपी अल्पवयीन असल्याने त्यांना आज बाल न्याय मंडळासमोर हजर करण्यात येणार आहे. या प्रकरणाचा पुढील तपास पोलिसांकडून सुरू आहे.