वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

  मुंबई हादरली! दुचाकी-ओला कॅबच्या किरकोळ धडकेतून सुरू झालेला वाद थेट हत्येत परिवर्तित; तरुणाला रस्त्यावरच संपवलं

 बांगूर नगरमध्ये धारदार शस्त्राने हल्ला; आरोपी चालक आणि प्रवाशाला पोलिसांनी गोरेगाव परिसरातून अटक केली

मुंबई: मुंबईतील बांगूर नगर परिसरात एका किरकोळ रस्ते अपघातातून सुरू झालेला वाद थेट हत्याकांडात परिवर्तित झाल्याची खळबळजनक घटना समोर आली आहे. दुचाकीची ओला कॅबला झालेल्या धडकेनंतर सुरू झालेल्या वादात चालक आणि प्रवाशाने मिळून तरुणावर धारदार शस्त्राने हल्ला करत त्याला जीवे मारल्याची घटना घडली.

अपघातातून हत्येपर्यंतचा प्रवास

मिळालेल्या माहितीनुसार, शरीफ अन्सारी (वय 27) हे मालवणी बॅक रोडवरून गोरेगावकडे दुचाकीवरून जात होते. यावेळी त्यांच्या दुचाकीची ओला कॅबला किरकोळ धडक लागली. या छोट्याशा अपघातानंतर दोन्ही बाजूंमध्ये वाद सुरू झाला. रागाच्या भरात अन्सारी यांनी हेल्मेटने कॅबवर मारहाण केल्याचा आरोप आहे. यानंतर हा वाद चिघळत जाऊन हाणामारीत परिवर्तित झाला.

धारदार शस्त्राने हल्ला

या भांडणादरम्यान ओला कॅब चालक सत्येंद्र गुप्ता (28) आणि त्याच्या गाडीत असलेला प्रवासी सुनील पाल (27) यांनी अन्सारी यांच्यावर धारदार शस्त्राने हल्ला केला. गंभीर जखमी अवस्थेत अन्सारी यांना तातडीने रुग्णालयात दाखल करण्यात आले, मात्र डॉक्टरांनी त्यांना मृत घोषित केले.

पोलिसांनी केली तातडीने अटक

घटनेनंतर पोलिसांनी तत्काळ हालचाल करत वरिष्ठ पोलीस निरीक्षक रविंद्र आव्हाड यांच्या मार्गदर्शनाखाली तपास सुरू केला. दोन विशेष पथके तयार करून काही तासांतच दोन्ही आरोपींना गोरेगाव परिसरातून अटक करण्यात आली. आरोपी सत्येंद्र गुप्ता हा मनसेशी संबंधित असल्याची प्राथमिक माहिती समोर आली आहे, तर दुसरा आरोपी सुनील पाल हा वॉटर पंप मेकॅनिक म्हणून काम करतो.

मुलुंडमध्येही धक्कादायक घटना

दरम्यान, मुंबईत कौटुंबिक वादातून आणखी एक धक्कादायक घटना घडली आहे. राजुकुमार गुप्ता याने 14 मार्च रोजी सकाळी मुलुंड स्थानकावर आपल्या 36 वर्षीय पत्नी पुष्पा हिला धावत्या लोकलसमोर ढकलून ठार केले. पती-पत्नीमध्ये सतत वाद सुरू होते. घटनेनंतर फरार झालेल्या आरोपीला सुरतमधून अटक करण्यात आली आहे. संपूर्ण घटना सीसीटीव्हीत कैद झाली आहे.