लग्नासाठी २ विमानं बुक, १७ कोटी भरून पॅलेस बुक; बड्या बिझनेसमनच्या मुलाला लोहगडावरून दरीत ढकललं, होणारी बायकोच निघाली मास्टरमाईंड!

संघाचे विचार मार्गदर्शक; तिथे संस्कार मिळतात'; काँग्रेसच्या टीकेला उत्तर; 'सरकारी अधिकाऱ्याने सार्वजनिक भूमिका मांडणे योग्य नाही'

क्रांती न्यूज (प्रतिनिधी) -  किरण देशमुख

मुंबई / नागपूर :  नागपूरचे नवनियुक्त पोलीस आयुक्त आणि प्रसिद्ध आयपीएस (IPS) अधिकारी विश्वास नांगरे पाटील (Vishwas Nangre Patil) यांच्या राष्ट्रीय स्वयंसेवक संघाच्या (RSS) मुख्यालयातील भेटीमुळे राज्यभरात राजकीय वादाला तोंड फुटले आहे . या मुद्द्यावरून विरोधी पक्षांनी नांगरे पाटलांवर टीकेची झोड उठवली असताना, राज्याचे उच्च व तंत्रशिक्षण मंत्री चंद्रकांत पाटील (Chandrakant Patil) यांनी मात्र त्यांची जोरदार पाठराखण केली आहे. चंद्रकांत पाटील यांनी थेट विश्वास नांगरे पाटील यांना संघाची शाखा जॉईन करण्याची खुली ऑफर दिली आहे.

 चंद्रकांत पाटील काय म्हणाले?

नांगरे पाटील यांच्यावर होणाऱ्या टीकेला उत्तर देताना चंद्रकांत पाटील यांनी त्यांची पाठराखण केली. ते म्हणाले, "विश्वास नांगरे पाटील हे आरएसएस मुख्यालयात गेले हे चुकीचे नाही. राष्ट्रीय स्वयंसेवक संघ काय देशद्रोही संघटना नाही. ती देशप्रेम शिकवणारी संघटना आहे. त्यावर बंदी आहे का?" असा प्रश्नच त्यांनी उपस्थित केला.

याचबरोबर संघाचे विचार हे अत्यंत मार्गदर्शक आहेत, त्यामुळे विश्वास नांगरे पाटील यांनी संघाची शाखा जॉईन करावी, तिथं संस्कार मिळतात, असे देखील त्यांनी म्हटले. सांगली महापालिका आयुक्त संजिता महापात्र यांनीही राष्ट्रसेविका संघात यावे, तिथे अभ्यास मिळतो, असेही चंद्रकांत पाटील म्हणाले.

नेमकं काय आहे प्रकरण?

विश्वास नांगरे पाटील यांचा एक व्हिडिओ सोशल मीडियावर मोठ्या प्रमाणात व्हायरल होत आहे . या व्हिडिओमध्ये ते एका हिंदू संमेलनात राष्ट्रीय स्वयंसेवक संघ (RSS) आणि त्याचे संस्थापक डॉ. केशव बळीराम हेडगेवार यांच्या कार्याचा उल्लेख करताना आणि त्यांच्या योगदानाचे कौतुक करताना दिसत आहेत . हा व्हिडिओ समोर आल्यानंतर त्यावर विविध स्तरांतून संमिश्र प्रतिक्रिया उमटू लागल्या आहेत.

सरकारी सेवेत असलेल्या एका वरिष्ठ अधिकाऱ्याने सार्वजनिक व्यासपीठावर अशा प्रकारची भूमिका मांडणे योग्य नसल्याचे मत अनेक नेटकऱ्यांनी व्यक्त केले आहे . या प्रकरणावर केवळ स्थानिक पातळीवरच नव्हे, तर राज्य पातळीवरही तीव्र पडसाद उमटले आहेत.

 काँग्रेसची नांगरे पाटलांवर टीका

महाराष्ट्र काँग्रेसने आपल्या अधिकृत सोशल मीडिया हँडलवरून विश्वास नांगरे पाटील यांच्यावर थेट निशाणा साधला आहे . संविधानाची शपथ घेतलेल्या वरिष्ठ पोलीस अधिकाऱ्यांनी राजकीय किंवा वैचारिक भूमिका सार्वजनिकपणे मांडणे हे लोकशाहीच्या तत्त्वांशी विसंगत असल्याचा आरोप काँग्रेसने आपल्या पोस्टमध्ये केला आहे . तसेच पोलीस अधिकाऱ्यांची भूमिका ही कायदा आणि सुव्यवस्था राखण्यापुरती मर्यादित असावी, असेही पक्षाने स्पष्ट केले आहे.

नांगरे पाटील यांची नागपूर येथे पोलीस आयुक्त म्हणून झालेली बदली हा याच राजकीय अजेंड्याचा भाग असल्याचा संशय व्यक्त करत काँग्रेसने राज्य सरकारवरही अप्रत्यक्ष प्रहार केला आहे . काँग्रेसच्या म्हणण्यानुसार, "संविधानाची शपथ घेतलेल्या अधिकाऱ्याने सार्वजनिकरित्या राजकीय विचार मांडणे हे लोकशाहीच्या मूल्यांशी सुसंगत नाही."

 राजकीय परिणाम

या प्रकरणामुळे राज्यातील राजकीय वातावरण तापले आहे. विश्वास नांगरे पाटील हे एक कार्यक्षम आणि निष्ठावान अधिकारी म्हणून ओळखले जातात. त्यांच्या या वक्तव्याने विरोधी पक्षांना सरकारवर हल्ला करण्याची संधी मिळाली आहे. दुसरीकडे, चंद्रकांत पाटील यांच्या पाठराखणीमुळे हा वाद अधिक तीव्र होण्याची शक्यता आहे.

विश्वास नांगरे पाटील यांच्या RSS भेटीचा वाद आता थेट सरकारी अधिकाऱ्यांच्या राजकीय निष्ठेच्या मुद्द्यापर्यंत पोहोचला आहे. चंद्रकांत पाटील यांनी नांगरे पाटलांना 'शाखा जॉईन' करण्याची ऑफर देऊन हा वाद अधिक तापवला आहे. काँग्रेसने याला लोकशाहीच्या तत्त्वांचे उल्लंघन असल्याचा आरोप केला आहे. आता पुढील काळात नांगरे पाटील यांच्याकडून किंवा सरकारकडून या प्रकरणी कोणती भूमिका घेतली जाते, हे पाहणे महत्त्वाचे ठरेल. हा वाद राज्याच्या राजकारणात आणखी किती तीव्र होतो, याकडे सर्वांचे लक्ष लागले आहे.