मुंबई: महाराष्ट्राचे मुख्यमंत्री देवेंद्र फडणवीस यांनी सोमवारी पत्रकार परिषद घेऊन महिला आरक्षण विधेयकाच्या मुद्द्यावर विरोधकांवर जोरदार टीका केली. विरोधकांमुळेच हे विधेयक मंजूर होऊ शकले नाही, असा आरोप त्यांनी केला. तसेच, राज्याच्या राजकारणात विरोधी पक्षातील त्यांच्या तोडीचा कोणताही नेता या विषयावर चर्चा करण्यास तयार असेल, तर आपण खुल्या चर्चेसाठी सज्ज असल्याचे आव्हानही फडणवीस यांनी दिले. आता यावरून शिवसेना ठाकरे गटाच्या उपनेत्या सुषमा अंधारे यांनी देवेंद्र फडणवीस यांच्यावर घणाघाती टीका केली आहे.
सुषमा अंधारे म्हणाल्या, “देवेंद्र फडणवीस यांनी २०२३ मध्ये ट्विट केलं होतं, त्या ट्विटचा अर्थ काय घ्यायचा? त्यात त्यांनी ‘ऐतिहासिक क्षण’ असं लिहिलं होतं.” असे म्हणत त्यांनी फडणवीस यांचे ट्विट वाचून दाखवले. “हे काय होतं हे फडणवीस यांनी समजावून सांगावं. जर आता तुम्ही म्हणत असाल की विरोधकांमुळे विधेयक पडलं तर या ट्विटचा अर्थ काय?” असा सवाल त्यांनी उपस्थित केला.
अमित शाह आणि मोदींच्या ट्विटचा मुद्दा
सुषमा अंधारे यांनी अमित शाह यांचे २०२३ मधील ट्विटही वाचून दाखवले. अमित शाह यांनी “महिला आरक्षण विधेयक लोकसभा आणि राज्यसभेत मंजूर झालं” असे ट्विट केले होते. सुषमा अंधारे म्हणाल्या, “फडणवीस साहेब, तुमचं काय म्हणणं आहे? खरं कोण बोलत आहे आणि खोटं कोण बोलत आहे? हे लोकांना कळू द्या.”
तसेच, पंतप्रधान नरेंद्र मोदी यांचे २०२३ मधील भाषण देखील सुषमा अंधारे यांनी पत्रकार परिषदेत ऐकवले. “बिल पास झालं,” असं त्यावेळी अमित शाह यांनी सांगितलं होतं, असे सुषमा अंधारे म्हणाल्या.
‘महिलांसाठी मुख्यमंत्रीपदाचा राजीनामा द्यायची तयारी आहे का?’
सुषमा अंधारे पुढे म्हणाल्या, “काल विधेयकाची भ्रूण हत्या झाली, असं फडणवीस म्हणाले. भ्रूण हत्या हा शब्द त्यांनी वापरला. त्यांना या शब्दाचा अर्थ कळला नसेल, त्यांना या शब्दाचं गांभीर्य नाही. सगळ्यात आधी महिला आरक्षणाची भ्रूण हत्या १९५१ मध्ये झाली. या विधेयकाला कोणी त्यावेळी विरोध केला? याला शामा प्रसाद मुखर्जी आणि मदन मोहन मालवीय यांनी विरोध केला होता. बाबासाहेब हे बिल मांडत होते, त्यावेळी या लोकांनी कडाडून विरोध केला होता. त्यानंतर १९५१ मध्ये बाबासाहेबांनी राजीनामा दिला होता.”
सुषमा अंधारे म्हणाल्या, “देवेंद्र फडणवीस साहेब, तुमची तयारी आहे का? मुख्यमंत्रीपदाचा राजीनामा द्यायची? तेही महिलांसाठी... डॉ. बाबासाहेब आंबेडकरांनी केंद्रात राजीनामा दिला होता.”
‘तुम्ही महिलांना कमी लेखता, चांगदेवाचा अहंकार भरलाय’
सुषमा अंधारे यांनी फडणवीस यांच्यावर आणखी तीव्र हल्ला चढवला. त्या म्हणाल्या, “तुम्ही काल खूप आव्हाने दिली. तुम्हाला माझे आव्हान आहे की, महात्मा फुले यांनी लिहिलेल्या दोन पुस्तकांचं वाचन तुम्ही RSS च्या वार्षिक कार्यक्रमात करणार का? ‘गुलामगिरी’ आणि ‘शेतकऱ्याचा आसूड’ हे फडणवीस यांनी वाचून दाखवावं. किमान या पुस्तकावर मोहन भागवत यांची काय प्रतिक्रिया आहे? ते तरी विचारावं.”
त्या पुढे म्हणाल्या, “साऊथ विरुद्ध नॉर्थ हा संघर्ष भाजप करत आहे. मुख्यमंत्री देवेंद्र फडणवीस यांनी विरोधकांना ‘रंग बदलणारा सरडा’ असं म्हटलं. मुख्यमंत्र्यांकडून ही अपेक्षा नाही. फडणवीस साहेब, तुमचा स्तर नेमका कोणता आहे हे आधी मला सांगा. तुम्ही हा स्तर कसा ठरवला? देवेंद्र फडणवीस साहेब, तुम्ही सुप्रिया सुळे आणि प्रणिती शिंदे यांचा अवमान केला. तुम्ही या दोघींच्या उत्तरांना नाकारता म्हणजे तुम्ही महिलांना कमी लेखता. तुम्ही महिलांना तुच्छ समजता. तुम्ही स्तराची भाषा केली. देवेंद्र फडणवीस यांच्यात चांगदेवाचा अहंकार भरला आहे.”
‘चर्चेला बोलवा, आम्ही तयार’
सुषमा अंधारे पुढे म्हणाल्या, “देवेंद्र फडणवीस साहेब, तुम्ही चर्चेला बोलवा. आम्ही तयार आहोत. जर तुम्ही चर्चा नाही केली तर तुम्ही सत्याला सामोरे जायला घाबरतात, असं होईल. वेळ, दिवस तुम्ही ठरवा, आम्ही येऊ. तुमच्या सगळ्या प्रश्नाची उत्तरं आम्ही देऊ. मी एकटी यायला देखील तयार आहे.”
फडणवीस यांच्या पत्रकार परिषदेचा संदर्भ
मुख्यमंत्री देवेंद्र फडणवीस यांनी सोमवारी पत्रकार परिषद घेऊन महिला आरक्षण विधेयकाच्या मुद्द्यावर विरोधकांवर जोरदार टीका केली होती. विरोधकांमुळेच हे विधेयक मंजूर होऊ शकले नाही, असा आरोप त्यांनी केला. तसेच, राज्याच्या राजकारणात विरोधी पक्षातील त्यांच्या तोडीचा कोणताही नेता या विषयावर चर्चा करण्यास तयार असेल, तर आपण खुल्या चर्चेसाठी सज्ज असल्याचे आव्हानही फडणवीस यांनी दिले होते. यावर सुषमा अंधारे यांनी तीव्र प्रतिक्रिया दिली.
महिला आरक्षण विधेयक नामंजूर झाल्यावर मुख्यमंत्री देवेंद्र फडणवीस यांच्या पत्रकार परिषदेवर शिवसेना ठाकरे गटाच्या उपनेत्या सुषमा अंधारे यांनी जोरदार हल्लाबोल केला. “२०२३ च्या ट्विटबद्दल माफी मागा, तुम्ही महिलांना कमी लेखता,” असे सुषमा अंधारे म्हणाल्या. फुले यांच्या ‘गुलामगिरी’ आणि ‘शेतकऱ्याचा आसूड’ वाचण्याचे आव्हान देत, मुख्यमंत्रीपदाचा राजीनामा देण्याची तयारी आहे का? असा सवाल केला. “चर्चेला बोलवा, आम्ही तयार आहोत. मी एकटीही येऊ,” असे सांगत सुषमा अंधारे यांनी फडणवीस यांनी दिलेलं आव्हान स्वीकारले. फडणवीस यांच्यात ‘चांगदेवाचा अहंकार’ भरल्याची टीका करत त्यांनी विरोधकांना ‘रंग बदलणारा सरडा’ म्हणण्यावरही नाराजी व्यक्त केली.
إرسال تعليق
Hi, thanks for reaching out to us! We’ve received your message and will get back to you shortly.
नमस्कार, आमच्याशी संपर्क साधल्याबद्दल धन्यवाद! आम्हाला तुमचा संदेश मिळाला आहे आणि आम्ही लवकरच तुमच्याशी संपर्क साधू.