शिंदेंच्या भाषणादरम्यान फडणवीसांची एन्ट्री, एका वाक्यात वाद संपवला; सातारा राड्याने विधिमंडळ गदगदले

बाळाला जन्म देऊन आई पळाली, तीन महिने सिव्हिल हॉस्पिटलच्या स्टाफने सांभाळलं; वीरप्रतापला निरोप देताना स्टाफला रडू कोसळलं!

आईविना अनाथ झालेल्या बाळाला तीन महिने ‘आई’ बनून सांभाळणाऱ्या नर्स-डॉक्टरांचा हृदयस्पर्शी निरोप; सांगली सिव्हिल हॉस्पिटलमध्ये शेकडो ‘आई’ निर्माण करणारी भावुक घटना

सांगली: सांगलीच्या सिव्हिल हॉस्पिटलमध्ये एक हृदयस्पर्शी आणि भावुक घटना घडली आहे. २६ नोव्हेंबर २०२५ रोजी एका बाळाचा जन्म झाला. मात्र जन्म देऊन दुसऱ्याच दिवशी बाळाची आई बाळाला सोडून पळून गेली. आईचा शोध घेण्यात आला, मात्र ती सापडली नाही.

बाळ शारीरिकदृष्ट्या नाजूक असल्याने सिव्हिल हॉस्पिटलच्या स्टाफने स्वतःच त्याचा सांभाळ करण्याचा निर्णय घेतला. तब्बल १५ दिवस बाळाला आयसीयूमध्ये ठेवण्यात आले. या दरम्यान बाळाला हर्निया झाल्याचे समोर आले आणि त्याचे ऑपरेशनही करण्यात आले.

त्यानंतर गेल्या तीन महिन्यांपासून हे बाळ सांगली सिव्हिल हॉस्पिटलच्या विशेष नवजात शिशु दक्षता केंद्रातील नर्सिंग स्टाफ सांभाळत होते.

नामकरण आणि भावुक निरोप

आज कोर्टाच्या आदेशानुसार आणि शासनाच्या निर्देशाने तीन महिन्यांचा हा बाळ पुण्यातील पाठक शिशु केंद्राकडे पाठवण्यात आला. यापूर्वी सिव्हिल हॉस्पिटलच्या स्टाफने बाळाचे नामकरण केले. पाळणा सजवला, रांगोळ्या काढल्या, फुग्यांनी सजावट केली आणि सर्वांनी मिळून बाळाचे नाव ‘वीरप्रताप’ ठेवले.

बाळाला निरोप देताना संपूर्ण स्टाफ भावुक झाला. अनेक नर्स आणि डॉक्टरांचे डोळे भरले, तर काहींना रडू कोसळले. तीन महिने रोज आईसारखे प्रेम आणि काळजी घेणाऱ्या स्टाफला बाळ सोडून देणे जड गेले.

अधिष्ठाता प्रकाश गुरव यांनी सर्व कायदेशीर सोपस्कार पूर्ण करून बाळाला पुण्याकडे रवाना केले.

स्टाफने निर्माण केल्या शेकडो ‘आई’

आईविना पोरका झालेल्या या बाळाने जाताना सांगली सिव्हिल हॉस्पिटलमध्ये शेकडो ‘आई’ निर्माण केल्या. तीन महिने या बाळासाठी प्रत्येक नर्स आणि डॉक्टर आई बनले होते. निरोपाच्या वेळी त्यांच्या डोळ्यातील अश्रू हाच या प्रेमाचा पुरावा होता.

ही घटना सांगली सिव्हिल हॉस्पिटलच्या स्टाफच्या समर्पण आणि माणुसकीची एक सुंदर उदाहरण ठरली आहे.