वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

 

इराण-इस्रायल युद्धाच्या पार्श्वभूमीवर दिलासादायक बातमी! कच्च्या तेलाच्या किमतीत १३ टक्क्यांची घसरण, ट्रम्प यांची मोठी घोषणा

इराणच्या वीज प्रकल्पांवर हल्ला होणार नसल्याचे अमेरिकी अध्यक्षांचे वक्तव्य; तेहरानकडून मात्र चर्चेचा दावा फेटाळला.

 मध्यपूर्वेतील वाढत्या तणावामुळे जगभरात कच्च्या तेलाच्या किमती वाढल्या होत्या. मात्र, आता अमेरिकेचे अध्यक्ष डोनाल्ड ट्रम्प यांच्या एका महत्त्वपूर्ण घोषणेनंतर कच्च्या तेलाच्या दरात मोठी घसरण झाली आहे. यामुळे जागतिक बाजारपेठेसह भारतासारख्या तेल आयातदार देशांना दिलासा मिळाला आहे.

तेलाच्या किमतीत मोठी घसरण :

ट्रम्प यांच्या घोषणेनंतर व्यापारादरम्यान ब्रेंट क्रूड सुमारे १५ टक्क्यांनी घसरून प्रति बॅरल ३६ डॉलरवर आले. ११ मार्चनंतर प्रथमच कच्च्या तेलाची किंमत १०० डॉलरच्या खाली घसरली. तसेच, वेस्ट टेक्सास इंटरमीडिएट (WTI) देखील १३.५ टक्क्यांनी घसरून प्रति बॅरल ८५.२५ डॉलरवर पोहोचले. एकूणच कच्च्या तेलाच्या किमतीत सुमारे १३ टक्क्यांची घसर झाली आहे.

ट्रम्प यांची मोठी घोषणा काय?

डोनाल्ड ट्रम्प यांनी दिलेल्या माहितीनुसार, अमेरिका आणि इराण यांच्यात वाटाघाटी सुरू आहेत. गेल्या दोन दिवसांपासून या चर्चा सुरू असून पुढील काही दिवस त्या सुरू राहतील. सर्वात महत्त्वाचे म्हणजे, सध्या इराणच्या वीज प्रकल्पांवर कोणताही हल्ला होणार नसल्याचे ट्रम्प यांनी स्पष्ट केले. पुढील पाच दिवस तेहरानच्या वीज प्रकल्पांना लक्ष्य केले जाणार नसल्याची ग्वाहीही त्यांनी दिली.

इराणकडून ट्रम्प यांचा दावा फेटाळला :

दुसरीकडे, इराणने मात्र अमेरिकेसोबत कोणतीही शांतता चर्चा झालेली नसल्याचे सांगत ट्रम्प यांच्या दाव्याला पूर्णपणे फेटाळून लावले आहे. इराणच्या वृत्तसंस्था IRNA नुसार, अमेरिकेचे राष्ट्राध्यक्ष डोनाल्ड ट्रम्प यांनी इराणच्या वीज प्रकल्पावर हल्ला न करण्याचा निर्णय इराणकडून मिळालेल्या इशाऱ्यानंतर घेतला. या अहवालात असेही म्हटले आहे की, मध्यस्थांमार्फतही इराणशी कोणताही संपर्क झालेला नाही. अशाप्रकारे दोन्ही बाजूंच्या विधानांतून विरोधाभास दिसून येत आहे.

होर्मुझची सामुद्रधुनी बंद, ऊर्जासंकट गंभीर :

अमेरिका, इस्रायल आणि इराण यांच्यातील संघर्ष आता चार आठवड्यांपासून सुरू आहे. या संघर्षात इराणने होर्मुझची सामुद्रधुनी बंद केल्यामुळे तेल आणि वायू पुरवठ्यावर गंभीर परिणाम झाला आहे. जागतिक ऊर्जा संकट अधिकच गंभीर झाले असून, त्याचा परिणाम भारतासह अनेक देशांमध्ये स्पष्टपणे दिसून येत आहे.

भारतीय चलनावर परिणाम :

आशियामध्ये भारतीय चलनावर या तणावाचा विशेष परिणाम दिसून येत असून, डॉलरच्या तुलनेत रुपया ९४.०१ पर्यंत घसरला आहे. तथापि, कच्च्या तेलाच्या किमतीत झालेल्या घसरणीमुळे भविष्यात भारतीय अर्थव्यवस्थेला काहीसा दिलासा मिळू शकतो, अशी शक्यता व्यक्त केली जात आहे.